Ofgelôôp’n wekke konne wiej èèm’n metpreum’n van het Markelse feest. Ie stoat er van te kiek’n hoevölle Hoolter of de weg wèèt noar Markel. Zô moeilijk is det ôk neet, nog altied biej de Poppe rechduur. Gek is het ôk neet. Umwiel zeej’ ne Hoolter presentèèr’n, zing’n of jureer’n. Det is ôk gen wôônder, het is ter altied ôôns kent ôôns en de ontvangst is as vanôôlds, ôôlderwets Maarkels. Al met al een onmeunig gezellig feest. Het dut oe verlang’n noar de Hoolter Kèunefeesten. Het lik ôk wal een betje op mekaa. Biej de bèire feesten is de tèènte het stralende middelpunt. Toch is het neet verkèèrd um zô noe en dan biej mekaa te goan kiek’n. Ie stekt er altied wat van op, de goeie dinge köj’ metnemm’n vuur het ààndere joar. Wat opvöl was, det ze het Koningsscheet’n hadd’n, mill’n in Markel vuur het ôôle gemeentehuus. Niks ofgezunderd, mà vol tuss’n de mèèns’n en noa oflôôp gung het in optoch noar de tèènte, woer de Schutterskoning met alle égards wörd’n ehuldigt. Misschien een idee um oaver te nemm’n en dan natuurlijk, den Dartkoning neet vergett’n. Genog oaver Markel, noe kiek e wiej uut noar ôônze Kèunefeesten met det machtige môôie feestplein. Moanden bint ze der à met gangs. De allerjungst’n trapt op dôônderdagmiddag 12 september al of met de play back show. DJ Sander dut het hèèle weekend dom vedan, mà den is het Kèunefeest ôk met de papleppel in e gèèm’n. Het echte feest barst lös at de vuurzitter, Haan’nsas, Ruben, Bert en Harry, de vrieje hàànd gif. Vriejdagoamd goat de jong’n uut eur dak met “PROOST”. Zoatermiddag ech femiliedag met Kèunescheet’n, Dart’n en het joarlijkse meedeinfestijn van de Hoolter Korhaan’n. Zô ontrolt zich het hèèle programma. Wat zal het gezellig wèè op het plein. Môôi weer, met ettende en drinkende lèu biej Bennie vuur ’n kroam. Kinder, diet in ne lange riege vuur de kop van jut stoat te wacht’n. Oolders diet, touwzeend, röstig geniet van een drankje. Altied pries, gen eene hooft er met leuge hàànne noar huus. Oh ja, nog één dingk, van te vuur’n köj allèène mà kaart’n kôôp’n met de compjoeter. Det neumt ze met de tied met goan. Noe möj’ wier een àànder verhaaltje bedèènk’n um van huus of te könn’n. Al met al bliew we ôôns verspits’n op de Kèunefeest’n. Bèèregezellig, vuur jong en ôôld, vuur iedereene
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
