Det zal vuur iedereene ôk wier ààns wèèr. Eind zestiger, begin zèumtiger joar’n kwamm’n ze ôk noar Hoolt’n. De plestiekfebriek schreeuw’n um volk en zo wark’n der, in één kèèr, koppels Marokaan’n en Italiaan’n an de Waagweg. Mèèns’n met moeilijke naam’nas Kebdani en Casa Grande. Det leste wörd’n dan drek à vertaald noar Grôôt’nhuus. De mèèst’n hadd’n huusvesting in Dèimter. Noa verlôôp van tied kwamm’n de gezinn’n oaver en wônn’n ze her en der duur de stad. Aarige lèu en zie pass’n zich good an biej de rest van het personeel. Zô was ter in die tied, alle joar’n een bedrijfsvoetbaltournooi. De bedriem’n uut die tied, ôôndermeer Universal, Udema, de Plestiek en de Vrijheid dèud’n der an met. ‘S oamds stunn’n de direkties langs de liene, um hun ploeg an te moedigen. Det gung good tutdet het een betje te fanatiek wörd’n en der meerdere spöllers, met blessures, ’n ààndern dag neet meer an het wark konn’n. Noa die wedstried blèèm’n de anmoediging’n achterwèège. Net as det de mèèste naam’n uut die tied vôt bint, is ôk het bedrijfsvoetbal ne zacht’n dôôd estörm’n. De term gastarbeider is ôk neet meer van disse tied. Wörd’n ze in het begin nog met een buske op ehaalt, later kwamm’n ze met mekaa in in een auto van de zaak. In die zèumtiger joar’n, plestiek kwam meer en meer in. Margarine in kuupkes, Bona was het allerèèrste mark. Dag en nacht, miljoenen kuupkes en deksels. De opmars gung zo snel det er bienoa iedere moand wal wier een niej mark bie kwam. Oaver het ofval maak’n zich nog gen mèinse drôk. Alle daag’n gung der wal ne container vol noar den horrebeeld op ’n Hoolterbarg. Meer as de helfte van alle botterbäkskes kwam wal uut Hoolt’n. In het begin wadd’n het nog kleinere machientjes, diet dag en nacht stunn’n te stààmp’n met twintig slaag’n in de minuute, een paar joar later wadd’n ze meer dan dubbel zo groot. De ôôle direkteur zelf had er een handje van um ze iedere kèèr een betje harder te loat’n lôôp’n, umdet ze ààns neet kônn’n voldoon an de vroage. Het antal warknemmers leup in tien joar
op van zo’n 30 tut 175 man. Riej’ noe oaver de Waagweg, ie zölt de plestiek neet meer vind’n. Eind joar’n zèumtig vertrökk’n ze, uut eur jäske egreut, noar ne nieje febriek in Goor. Ôk doar zöj’ ze neet meer vind’n. Plestiek, het is wat verpakking betreft uut de tied. Gastarbeiders, ôk ne term diet noe neet zo angenaam meer klinkt.
