Vuurige wekke op zeuk noar “Het dikke gat”, nen ansichtkaarte van vrogger. Wat môôi det er dan reaktie kump van ôôld Hoolter Martin Hols, diet ôôns, saam’n met zien moat, een prachtig noaslagwark hef noa eloat’n oaver Hoolt’n in den tweed’n wereldoorlog. Het is à van 1984, mà nog altied blif het een machtig noaslagwark. “Holten in oorlogstijd” is een book wat in Hoolt’n, in gen ééne book’nkaste mag ontbrekk’n. Zelf hè’k ‘t à wà tien kèèr elèèz’n. Alle respekt en dàànk vuur al die uur’n diet doar in zit. Van den Martin Hols krèèg ik duur det het dikke gat tuss’n de orientatiesteender nèènge en tiene möt hemm’n elèèg’n. Het möt wèè ten ôôst’n van de dagcamping. Wie hef doar ôôit rogge verbouwd of hef doar nog een stuk làànd? Wie tèuvert det stukske van de puzzel boam’n water? Het zôl môôi wèè as den ôôld’n naam wier op de kaarte wördt ezet. Wiej loat ôôns verrass’n. Zelf wörd’n wiej disse wekke verdeetig verast duur het hengoan van één van de ôôld Prins’n van de Fienpreuvers. Wiej schrieft 1973. Een man uut het Broabààntse zuud’n. De man met de zachte G. Hij kwam van MULO in Helmond. Hij was ôôit de jeugdleider van de Gebroeders van de Kerkhof. Hij hef ze leer’n voetball’n. Het carnaval wörd’n ‘m biej OLUM met de papleppel in egèèm’n. Hij brach in det joar het Hoolt’ns carnaval noar hèugere sfeer’n. Hij brach Hoolt’n het Prinsenbal en leut de Hofbar vanof die tied rôônd goan. In latere joar’n vuurzitter en lid van de Prinsengarde en Senaat. Nog later zag ie ‘m steevaste op de oamde van Keunedarp lacht en op carnavalszoaterdag ontbrök e neet in het carnavalsgeweeld van Keunedarp. Noe achtenvèèrtig joar later, 81 joar ôôld, is Fons Akkermans goan hemelen. Vuur miej hè‘k ne foto van vief van pioniers in vol ornaat. Ze bint er noe alle vieve neet meer. Het bint wà grôôndleggers van hèèl völle carnavalsplezèèr in Keunedarp. Wat zölt ze doar boam’n wille hemm’n saam’n met al die ààndern, diet ôôndertuss’n ôk àmoa doar hen verhuusd bint. Netuurlijk is het vuur de neuiste femilie arg verdreetig, oen man, vaa en opa te mönn’n miss’n. Doar is een gat evöll’n. Met het verstriek’n van de tied hop ie det het verdreet meer en meer plaatse maakt vuur al die môôie herinnering’n. Wiej zölt ‘m neet vergett’n, de man van “Heerlijk feest” en “Je beste vrienden zitten biej de Fienpreuvers.” Zo is het en zô zal het altied bliem’n.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
