Kôôle kaale bèume, mist oaver ’t natte làànd.
Alles is zô still’ en dôôds, de natuur lik op e bràànd.
Stroom’nden kôôld’n rèèg’n, smerig, nat en guur,
Stroomt èèrs duur een götje en dan het slèutje duur.
Veerder stroomt het noar de bekke, wat hef het allemoa vuur zin?
De karsdaage die stoat vuur de duure, het nieje lech, een niej begin?
Twei zwarte zwanen op den stroom, zô te zeen hebt ze de tied.
Hèinig an drieft ze wat veerder, bint zie ôk de richting kwiet?
Deep’n krisus, ‘t geet neet bes meer, keerskes an in plaats van stroom.
Gen stromend water uut de kraane, armood troef, mà gen atoom.
Alle daag’n wier genèuzel, alle daag’n, het is een kruus.
Stromend water uut de putte, steet te prötteln op ’t fernuus.
De karsdaag’n stoat wier vuur de duure, stroom’n karskaart’n an de muure.
Biej buskes kômt ze binn’n stroom’n, kaartjes met gekluurde bloom’n.
Stroom’nden rèègn langs de roete, van ’t joar vuur ’t èèrs, gen krint’nstoete.
Gen stroom, gen kachel en gen lech, stoet’npap is ôk neet slech.
Eerpelschell’n vuur ’t ôôle peerd, zuunig an, zô ‘w ‘t hebt e leert.
Het geeld van de gewone man, stroomt àmoal op de graaiers an.
Stopt den stroom, dit geet neet good, hôôge tied, daw we wat doot.
Stroom’n lèu stroomt noar de kark’n, grôôt’n armood, ‘t is te mark’n.
Gen stroom, het is ja net ô‘k drèume, met karsfees, keerskes in de bèume.
Het geet zô slech, ik stroome vol, met ôôlde joar gen oliebol
Armood, het klinkt hèèl apart, heiw w’t wal ôôit zô good e had?
Môôie preuitjes, ‘k bin ze zat, die geleerde lèu, zie könt miej wat.
Geeld, geeld, geeld, loat het toch stroom’n, zôdet de wereld op kan stoom’n.
Hèinig an en zuunig weer, det kent de lèu agèèt neet meer.
Mà krisus, det geet völle veerder, alle daage nog te ett’n.
Dè’s gen armood, det is eerder, met verschill’nde moat’n mett’n.
Lekker makkelijk met ‘n stroom met, lekker, làànkuut op de rugge.
Zwoarder geet het, tèèg’n de stroom in, àmoal eenen stap terugge,
De Vèèrkàànte Viefkop.
De leste Viefkop van het joar.
Bedàànkt van miej met fijne karsdaag’n
En völle geluk in ’t nieje joar.
Teun Deijk
