Snatergat

Van de wekke krèèg ik een beukske ôônder ôôg’n met korte verhaal’n. Een verhaal, met as titel “Snatergat”, trök mien andach. Opa koch meerdere joar’n hoolt van Jordens op het Snatergat. Achter op ’t Brook, vanof Kroon’nbarg leer’n de singels met perceel’n hoolt. Vuur ‘n hooltverkôôp struin’n iedereene langs de gekapte perceel’n, um mà te prebèèr’n, het geschikste perceel an te kôôp’n. De lèu hadd’n hoolt nèurig vuur in de kachel, vuur rikkepöste en in de kokkepot. Het hoolt wörd’n op de perceel’n verwarkt. De rieze gung netjes an buskes en wörd’n thuus op de riezemiete estapelt. Van het dikste eek’nhoolt wörd’n rikkepöste emaakt, um de ofrastering um de wèid’ns in takt te hôôld’n. Het dunnere en minder goeie hoolt wörd’n op’n zaagbok an kluppeltjes ezaagt. Dagenlàànk stunne wiej te trekk’n an die grôôte zaage. De dikste stukk’n wörd’n later dan nog is met ’n iep in stukk’n ehöuw’n, op ’n poer. Het Snatergat, een bos an de Hoolter kàànte van de ôôle Schipbekke, op t èine van ’n Darperdiek. Èigelijk was het Hoolt’n, toch völt het noe ôônder Battem. As kinder leupe wiej langs de ôôle bekke in de richting van die ôôle boerderieje diet doar, deepe verbörg’n, stund ôônder de hôôge bèume. Die boerderieje heet’n, het Snatergat. Die geschiedenis geet terugge tut 1682. In det joar is de Schout van Hoolt’n en Battem, de eigenaar van det arf, woer Henrick Snatergat op boert. Völle eulder zal het neet weer, want het lag net an de splitsing van de ôôlde Sallandse Landweerd (de Botterbekke) en de Schipbekke (noe ôôle Bekke). Det betèèk’n in die tied det er vaake las was van hôôg water. Det blik ôk wà as ter in 1749 völle waterschaa is an de boerderieje. Het arf hef in de zèumtiende eeuw recht’n in de Marke Hoolt’n, mà vuur de Marke Battem en Lôô bleef het ne Katerstede. Diezelfde boerderieje is in 1726 bekèènd ôônder ‘nen ààndern naam “Beekvlied”. Det gif ôk wal an det het umringd is duur water. In de lôôp van de tied komt verschillende kôôpers noar vuurt’n. De femilie Jordens verkoch de slech ôônderheul’n boerderieje in 1762. Kennelijk wördt er in de joar’n doarnoa ne buut’nplaatse van emaakt. In 1808 wörd’n het as spijker en katerstede verkoch an de gebroeders Kroonenberg in Dèimter. Het spijker wördt of ebrökk’n, mà de boerderieje met ne heer’nkamer blèèf en den was ter in 1996 nog altied. In 1890 kump de cirkel wier rôônd as Johanna, barones Sloet, weduwe van Mello, baron de Vos van Steenwijk het “Snatergat” wier verkoch an H.G. Jordens. De naam’n, Kroon’nbarg en Jordens en Snatergat, bint nog altied bekèènd in Hoolt’n.