Poasvèur of pisvèur

Het maakt niks uut. Het geet er umme, um met mekaa iets trechte te stôôt’n. Het ofgelôôp’n joar, zô vanof mei, had ik de eere um een poasvèur’nbook te maak’n oaver de boakes rôôndumme Hoolt’n. Ankommenden vriejdag is het zô veer en zal ôônz’n börge mèister het èèrste book in ontvangst nemm’n. Ne hôôp lèu hebt zich al e meld um der ééne te reservèèr’n. Vanof vriejdag is het book biej de boak’nbouwers en in Hoolt’n biej Heusinkveld en de VVV te krieg’n vuur nen uutzunderlijke pries van twaalf en halve euro. Tweihonderd bladzied’n op a-vèère, met tweihonderd foto’s. Het zal vaste neet volledig weer, mà het gif oen wal een beeld, hoe drôk of de Hoolter in al die joar’n wadd’n met de boakes. Het gif een beeld van ’n ôôld’n Willem Beijers, diet in 1929 al bèèzig was met ne wedstried um de grötste poasbult. Het nèimp oe met noar nen ôôld’n stoomtrein dent links en rechts de vèur’n zut bràànd’n in het wiedse Sallààndse làànd. Het löt de eeg’nzinnighèid zee van de Hoolter, diet neet gung’n vuur een gezamenlijk poasvèur, mà vuur ne poasboake, op e bouwt duur de eeg’n buurte. Het löt de rauwheid zeen, uut de tied van net noar ’n oorlog. Bekvechterieje oaver de kuuring’n uut de joar’n zestig en zèumtig en het nieje begin, eind joar’n tachtig. Machtige foto’s van het grötste poasvèur van de wereld. Het unieke verhaal van “Man bit hôônd”, het slôôtzitt’n in ’n Bèusebarg, de ontvangst in ’t Hoolterbrook en het verhaal van ’n Lech’nbarg in ’t Riessens. Vuur ne hôôp lèu zal het een ne rèize weer, trugge in de tied, dèènkend an al die môôie uur’n diej’ duurbrach’n an de voot van oen eeg’n poasvèur. Um zôô trugge te kômm’n in de tied van vandaage, ne dikke moand vuur poas’n. Àj’ een rondje maakt langs de verschillende bouwplaats’n, zeej’ à wier onmeunig völle hoolt ligg’n. Weer of gen weer, de jongs pokkelt alle wekk’n drôk an de boakes. Vuur de buut’nstoander lik het misschien det het vanzelf geet, mà doar kom ie wal achter àj’ ne dag wark’n achter de kiez’n hebt. Gelukkig is ter ne hôôp gezelligheid. Doar ontsteet kammeroadschap vuur ’t lèèm’n. Het hèugetpunt ieder joar, is neet de hèugte van de boake, mà het met mekaar iets trechte maak’n. Ôôld en jong diet met poas’n biej het vèur stoat en geniet van de warmte en het kommende vuurjoar. Dit joar könt de vrèimd’n en de Hoolter met het nieje book, grôôt’ndeels e schrèèm’n in t Hollàànds, nog is extra noageniet’n. Opgoan in die ôôlde gewoonte diet Hoolt’n ieder joar wier op de lààndelijke kaarte zet. Misschien wel de mèèst bekekk’n bràànd van hèèl Nederlàànd. Het maakt niks uut of het noe poasvèur’n of pisvèur’n bint en wat ’n àànder der van zeg möj’ langs oen hen loat’n goan. De traditie mag neet verleuirne goan, doar zöw met zien all’n vuur mönn’n bliem’n vecht’n, wis en waarachtig.
De Vèèrkàànte Viefkop.