As oen moat begint te schriem’n oaver stroatnaam’n, möj’der biej wèèr. Het nieje plan op de Kol steet in de stèigers. Een plan met völle greun, met ne môôien oaverlôôp noar ’n Hoolterbarg. Netuurlijk hef L.J. grôôt geliek um neet van die nikszeggende naam’n te bedèènk’n. Naam’n diet achter een buro bedach bint en niks te vertell’n hebt oaver ôôns Hoolt’n. In al die joar’n dà ‘k de Hoolt’nse sproake oaver oele hen môgge strèui’n, hebt miej meerdere Hoolter beneuiderd. Zie vund’n det de plaatsnaam’n, betrekking môss’n hemm’n op ne verbinding met ôôns darp. Het kwam der neet van. Sommige persoon’n krèèg’n in de joar’n zèumtig, zelfs biej lèèm’n, à ne stroate noar zich verneumd. Meerdere kèèr’n wörd’n miej in die latere joar’n altied éénen naam eneumd, mar umdet ze het achter de tèèk’ntoafels better wuss’n, zitte wiej noe met koolwitje en distelvlinder. Veerder trouwens niks mis met. Vanuut het gemeentehuus wörd’n der ezeg, det ze gen stroat’n meer noar persoon’n neum’n. Later wörd’n det herreup’n en wadd’n der misschien toch wà mèugelijkheed’n. Het schient det er zelfs touwzegging’n bint ewes. Hoe het ôk is, met naam’n möj’ altied vuurzichtig bliem’n. Noe ter vuurige wekke toch naam’n bint eneumd en doar den eenen naam wier neet bie stun, wi’k ter wier op wiez’n, um den naam hèèmoa vuurop te zett’n. As ter ech een môôi plein kump, dan zôl det toch het Börgemèister Enklaarplein mött’n word’n. De man is à wier een dikke twintig joar uut de tied, mà ziene verdeenst’n vuur Hoolt’n bint grôôt. De jungere generatie wèèt het al neet meer, des te belangrieker ,um een paar dinge te neum’n. De grôôte driefveer achter het loat’n herbegrèèm’n van de ôônze Canadeez’n op ’n Barg. De wederopbouw van Hoolt’n. Het haal’n van middelbaar ôônderwies noar ôôns darp en neet te vergett’n het ontvang’n van Prins Carnaval in het verzuulde Hoolt’n. Met disse paar feit’n doo w’m te kort, mà de rest loa ‘k geerne oaver an de lèu diet er vuur duur hebt eleerd. De naam’n diet bint eneumd bint zeker neet onbelangriek en ie könt er vaste nog wal een antal biej zett’n, àj’de historie van Hoolt’n der biej haalt. Loat oe vuural heur’n, loat het gemeenstebestuur wèèt’n, dàj’metlèèft, zôdàj’ straks neet zit met naam’n woer gen èènkel verhaal achter zit. Het is noe of nôôit.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
