Eindelijk, noa alle narighèid van virussen en àànder ongemak, mag de viem’nvieftigste Prins van de Fienpreuvers beginn’n an een normaal seizoen. Het jubileum, viem’nvieftig joar Fienpreuvers, kump neuider biej. Môôi man, wie had det könn’n dèènk’n. Prins Plakkie van de Leggenbarg. In de bomvolle zaal was e der in één kèèr, saam’n met adjudant Gait. De Fienpreuvers bint er in eslaagt um ne niej’n prins te vind’n van buut’n de eeg’n geleedern. De viem’nviefstigste prins en ’n allerèèrst’n van de Leggenbarg. Det belöf wat. Ne bomvolle zaal, zo völle volk hebt ze neet eerder ehad. Eigelijk kan det ôk neet ààns, want inmiddels hebt de Fienpreuvers 888 leed’n. Het 888 ste lid is Kroonprinsje Hendrik Zwiers van de Leggenbarg. Het lek ter arg op det die ofgelôôp’n zoaterdag àmoa biej de Poppe wadd’n. Het wörd’n ne machtigen môôi’n oamd, wat det betreft kan carnaval in Kèunedarp der wier volop tèèg’nan. Hoe was det dan vuur viem’nvieftig joar trugge. Noh, de notabeln hadd’n der neet völle vedusie in. Carnaval in het verzuulde Hoolt’n, det kon neet, det was vuurbeheuld’n an de katholiek’n ôônder de grôôte rivier’n. Noe was het in ’t begin ôk nog hèèl klein van opzet. De kleere wörd’n emaakt duur de vroole van die èèrste pioniers. Een gel mechester keepje en vuur de prins een wapperend
klèèdje van ziede. Die èèrste Road van Elme bestun uut zèum man. Noe lôôpt er een dikke zèumtig rôônd met ne Fienpreuverspette. Één dinge was geliek an ofgelôôp’n zoaterdag. Zaal Amicitia was ofgelaad’n vol met àmoa spöllers en supporters van de Rôôd Zwart’n. Die èèrste hoogheid, Prins Water Jan kwam zô mà binn’n wappern en vertell’n meteen det e gung trouw’n met zien Janna. Det kon neet meer kepot. Hoolt’n had ter à meer dan twintig joar op ewacht. Veerder was e kort van stof. Hij eindig’n het verhaal met zien motto, “En noe àmoa zoep’n”. Det was neet tèèg’n doavemansoor’n ezeg. Het wörd’n een onvergettelijk feest. De verbroedering van Hoolt’n was begunn’n. Môôi man. In al die joar’n bint de Prins’n ekèuz’n uut alle heuke en alle loag’n van de bevolking. Het dut er neet meer touw, wat vunne kluur shurt ôj’ hebt of van wat vunne club ôj’ bint. Het carnaval in Keunedarp is ter vuur iedereene. Vanof disse kàànte wèènse wiej de nieje hoogheed’n alle succes en völle wille. Het zal ne triomftoch word’n met allèène mà heugtepunt’n en op het toppunt van ziene regeerperiode nemt Prins Plakkie en Adjudant Gait ofscheid met het viem’nvieftigjoarige bestoan van de Fienpreuvers. Tut die tied zöw we nog vaake heur’n, môôi man, de lijfspreuk van Plakkie.
