Januari, hartje winter, wegsoez’n, veer weg in de tied. De dasse umme, schaats’n ôônder, met mekaa noar de Noordpool. Wiej hadd’n nog van die heult’n schaats’n, met oranje kluurige lint’n, vaste bund’n umme de nekke. Noa een half uurtje schaats’n, slobbern van de zuukelaa. Hard de bôch duur, pootje oaver, tut det ’t te duuster wörd’n,.want dan jeug’n ze ôôns van ’t ies of, krèèj’ ne bessem vuur de schaats’n. Op de slèè de Motieweg of, gloepens hard tut ôônderan. Basken duur de bargen schnèè hen, völs te laate biej schoole komm’n. Gliebaantjes maak’n op het schoolplein, ach hoe wèinig zeej’ det nog.
Gelukkig wörd’n het ôk wier vuurjoar. Schoolfeest, met mekaare zing’n, vuur de ôôle Koniginne, in ‘t darp biej het gemeentehuus. Doarnoa ne film, de Dikke en de Dunne, op Kalfstermanswèire, spöllekes. Àmoa krèèg ie een kedootje, ôônz’n dag kon neet meer kapot. Of en touw hàj’ nog wat extra’s, ne môôie pries met spiekers poep’n. In Mei dan wörd’n ie of marchèèrt, met alle kinder, dwars duur ’n Èènk. Dan kwamm’n ze, ôônze Canadeez’n, de jongs diet Hoolt’n hadd’n bevriejd. Hèèle koppels gung’n de barg op, Indiaan’n wadd’n der biej. Uur’n làànk stunne wiej te kiek’n met een bleumke in de hàànd. Doar wadd’n wichter diet doar flauw völl’n, vuur het Volk en Vaderlàànd. Gelukkig was ter ôk vakààntie, vaa en moo, die gung’n nôôit vôt. Help’n hèui’n en roggebind’n, det was meer ôôns kinderlot. Mà de allermèèste wille, boavenop een vôôr met hèui. Zingend gunge wiej op huus an, vakààntie was de mèuiste tied.
In augustus wier noar schoole, ne klasse hèuger, mèèstal wà. Ne nieje juffe of ne mèister, och ie wenn’n der hèèl rap an. De harfstied kwam, rèèg’n, wind en hagel, sleug’n biej vlaag’n tèèng’n oe an. In december wörd’n ie hèinig, Sunterkloas kwam in ’t làànd. Wiej môss’n altied extra oppass’n, zôvölle haw w’al uut e haald. Ieder joar toch een kedootje, nen auto, mà gen oaverdoad. Neet met, in de zak van Pietje, Spanje heiw we nôôit ehaald. Kômme terugge noar vandaage, Karsfeest, volgende wekke à. Prebèèrt te geniet’n van de warmte, een Christuskind is ôôns geboor’n. Èèm’n de narighèid vergett’n en de zörg van alle dag. Karsoamd, beginn’n met lechjes bràànd’n, bezinning op wat was en is. Karsoamd worste pannekooke, heur ie äns een vrèimd geluud? Neet noa buut’n hen, want ‘t kan weer, dat doar Derk geet, met zien Beer. Dit joar löp noe op zien èine, de twintiger joar’n goat beginn’n. Wat ’t ôôns zal brengen, hoe ‘t ôk mag goan, àmoa hèèle fijne Karsdaag’n en völle geluk in ’t Nieje joar.
