Het zat er à vrog in. Zô gauw àj’ HMV in ’t darp heur’n, sprung ie in de klôômpe en gung’n der achter an. Ie zagg’n ze vuurbiej machèèr’n biej Dikkers op de kruussing. Vuuran Ott’n Herre, met geveul vuur theater, potsierlijk houw’nd op de potdeksels. Hèèmoa vuuran, ’n ôôld’n Meinsma. Stèèvig in de pas, met een strak gezichte, opgoand in zien vaandel. Ie könt wà noagoan woet ziene noazoat’n det muzikaale van hebt. Vuur daj’ der arg in hadd’n wadd’n ze vuurbiej en kek ie tèèg’n de brèède rugg’n an, van Benhard van ’n Tol en Ab Westerik. Die joar’n bint vuurbiej e vlèug’n, mà nog altied is HMV springlèèm’nd. Zie bestoat zèumtig joar en doarumme gèèft ze, op 21 meert, ne grôôte show met àmoal ôôld leed’n en leed’n. Det màj’ neet miss’n. Één kèèr wier geniet’n van al die keerls en vroole, diet de Hoolter feestelijkheed’n, in al die joar’n, muzikaal hebt begeleid.
De verkiezing’n vuur provinciale staat’n en het waterschap stoat vuur 18 meert op ‘n agenda. De kandidaat’n rèurt zich à deftig. Nôh ja, neet de kandidaat’n, de landelijke Heer’n veult zich gereup’n. Dè ’s gen wôônder, de regeringspertiën stoat er merakels slech vuur. Gen wôônder, det met mekaa goan van VVD en PvdA, hef onmeunig völle kwoad blood e zet. Gen wôônder det de kiezers dèènkt, det peerd slöt miej neet wier. Zie rollebolt àmoal oaver mekaar hen en de kràànt’n doot er deftig an met um, toch vuural noe, zôvölle mèugelijk, de smerige wasse, buut’n te hang’n. Verkèèrde declaraties, per ongeluk, bestelling’n gèèm’n an femilie, juus noe excuus anbèè, vuur alle argenis in Groning’n. Het heult mà neet op. Het gekke is, wat ôk ’n uutslag wördt, in de tweede kamer geet de regering gewoon vedan. De Griek’n möw we help’n, Fràànkriek möw we uutstel gèèm’n, mà biej ôôns môs het mes ter drek in. Wiej lèèft in ne democratie zôônder beparking, mar ie könt oe zô gangswieze ofvroag’n of det nog van disse tied is. De stemwiezers helpt oe ök à neet veerder. Één van de vroag’n, möt er subsidie noar islamitische instelling’n? Verkèèrde vroage, möt er subsidie noar karkelijke instelling’n? Ja of neet. Kiekt het mar is noa, wiej lôôpt àmoa met ne fôss’n botter op ‘t hèufd. Biej Pauw zag ik ne keerl dent, volgens eeg’n zegg’n, wier trugge was op het “goeie” pad. Van zien verhaal wörd’n ik neet bliej en ôk de ààndere gast’n veul’n zich neet op het gemak. Het is ne beerputte, woet in e rèurt möt word’n en de lôch diet er of kump, zöw we vuur leef mönn’n nemm’n en rap ofvoer’n, ôw we det noe fijn vindt, ja of neet. Det geet neet in één’n dag, mà zie zölt in ’n Haag mönn’n stopp’n met nèuzeln achter de komma en spiekers met köppe sloan, ààns ettert het zweer als mà veerder. Zachte hèèlmèisters maakt stink’nde wôônd’n, wis en waarachtig.
De Vèèrkàànte Viefkop.
