Det zal vuur oele àmoal wà geeld’n en vuur miej is ’t neet ààns. De vrouwe slept miej wek ‘in wek’ uut met noar alle katt’nkarms’n en doarumme goa ‘k één kèèr in de twei joar met eur noar de Battumse revue. Ik rie der hen en zie rit altied netjes wierumme. Hèèmoa Battums is die revue trouwens neet. Doar doot Hoolter met en det was te mark’n. Doar zat mie toch ne mach Hoolter volk in de zaal, ja, mangs möj wat. Noe zegt ze in Battum altied, det in Hoolt’n alles grötter en mèuier is, mar in dit geval mö ‘k ze ongeliek gèèm’n. Zie hebt ter alles an doane um met de tied met te goan en Mans en Geertje van de Windbuul, (gen femilie van de Hoolt’nse Buultjes) belèèft wier vanals. Mans leup, as ne kippe zôônder kop, blad te bloaz’n en snapt ziene eeg’n bakk’n neet en Geertje leup wier ôôlderwets, as ne helgen haan’n, oaver ’t toneel te trèè. Zie dààns’n zelfs nog met de jonge fluit’n met, umdet ze mà zèum man hadd’n. Volgens de vrouwe had ze det neet hèèmoa good e zeene, mà det zal de tied ôôns leer’n. Hèèmoa niej is den beestekôôpman Kootje,met de bak van de dag. Doar köj’ met vedan, de zaal lèè dubbel van ’t lach’n. Zie hebt er geliek mà twei oamde biej an e knupt. Kiekt mar is op www.battumserevue.nl . Àj’ leever körter biej huus blieft, volgende wekke zoaterdag is ’t wier zô veer. Vanof die tied köj’ in Hoolt’n wier kiez’n tuss’n Sunterkloas, de Kerstman en Prins Carnaval. Ja, ie möt keuzes maak’n. en doarumme bin ‘k bliej det ze in Hoolt’n kiest vuur Zwarte Piet. Alle verààndern is gen verbettern. In tweiduuzendvèèrtiene heurt iedereene der biej. Doar is zôvölle armood in de wereld en dan zitte wiej in ôôns kleine läänneke te nèuzeln oaver een machtig môôi kinderfeest. Loaw we ’t leever hemm’n oaver de man diet, bienoa in zien eentje, het gevech an is e goane met ôônze gemeente. Hèèl lange is det stille blèèm’n in Riess’n. Het grôôte gevech tuss’n David en Goliath is noe beslist in ‘Haag. Het gôônst van de geruch’n en die verdeent zô te heur’n gen schoonheidspries. De geschiedenis hef zich gelukkig herhaalt, David hef an ’t langste einne trökk’n. Het zôl Goliath sier’n at ze binn’n de kortste kèèr’n disse zaak vuurgood uut de wereld helpt, zôdet de vlagge oaverà uut kan. De vlagge uut, vuur Sunterkloas, de Karsman en Prins Carnaval. Doar is nog meer um van te geniet’n, de vallende blaa, het môôie weer, de harfs met ziene onverwachte kluur’n. Wiej lèèft in ne roazende wereld. Het is ne trein dent, zôônder stopp’n, duur davert. Ie könt er hèèl èèm’n ofspring’n. Èèm’n röste en dan wier vedan, want den trein roast veerder. Vuurdaj’ der arg in hebt davert e het nieje joar in op weg noar? Mangs möj’wat, wis en waarachtig.
De Vèèrkàànte Viefkop.
