Het kabinet is e völl’n. Het is de scheuld van de PVV. De VVD en het CDA, die wadd’n gewillig. Àànderhalf joar hebt ze precies e doane wat de PVV wol, àj’ de oppositie meugt gelèum’n. Noe môs ter extra word’n bezuunigd en dan goat de kiezers mettell’n. De regèèrders trökk’n zich trugge achter de muur’n van het Catshuus. Met eur drei’n wadd’n ze ’t oaverà oaver eens. Het buro môs ’t àllèène nog èèm’n duurrekk’n. Det was schrikk’n en de PVV heuik’n of. Spring’n oaver de eeg’n schaduw is onmeunig moeilijk. Onverantwoord?! Brussel môs drei percèènt hemm’n en àj’ doar ààns oaver dèènkt, dan heij’ der kennelijk ééne hen waterdörs’n. De CU, D 66 en Greun Links hebt moand’nlàànk e scheuld’n op dit kabinet, met as lilluke dèer, de PVV. Diezelfde PVV hef ze noe de kààns e gèèm’n um het làànd te redd’n. Zie stapp’n der in. In twei daag’n wadd’n ze der uut. Het làànd is e redt. Het làànd woet de schuld harder oplöp as daj’ könt tell’n. Het làànd met wà dreihonderd miljard an spoargeeld, woej’, àj’ ’t netjes doot, hoaste gen rèènte op könt krieg’n. Hoevölle möt er bezuunigd word’n? De politiek geet er van uut, daj’ nog vèèr precèènt vangt en zô belast ze ’t ôk. Het làànd woej’ oe schel betaalt an de benzine. Het làànd woej’ könt lèèz’n det Brussel wier zèum miljard meer nèurig hef, terwijl det ze in sommige làànd’n, met Griek’nlàànd vuurop, an ’t infuus ligt. Brussel woet ze op die drei precèènt neet kekk’n, toen ’t nog good gung. Ie heurt ze in Brussel à wier zegg’n, zèum miljard, dè ’s toch ne klèinighèid. Is det zô, loat ze dan is beginn’n met ne bezuuniging van zèum miljard. Kan det neet, loat ze dan is beginn’n, neet meer één kèèr in de moand met ’n hèèl’n kroam noar Straatsburg te goan. Loat de geleerde heer’n, het goeie vuurbeeld is ne kèèr gèèm’n en der vuur zörg’n dar e wiej het vertrouw’n in de politiek wier kriegt. De PVV en SP hebt wèinig vertrouw’n in Europa. De PvdA schommelt er een betje tuss’n in. Op 12 september dan mag e wiej wier kiez’n. Woer möj’ noe op stemm’n. Aj’ teeg’n die geeldsmieterieje van Europa bint, woj’ apart e zat. Aj’ etröff’n wordt duur keiharde moatrèègeln, diet vuural an de ôônderkàànte schniet, dan möj’ oe wà rich’n tut die pertiej’n, diet beloafd, oe doarin te zölln help’n. Ie möt mà hopp’n det ze noa de verkiezing’n de rugge zô rech mèugelijk hôôlt. Het blif moeilijk, neet te geleum’n en neet te begriep’n en det neumt ze politiek. Vuur 12 september zölt ze àmoa wà wier in ’t programma hemm’n stoan, det ze ’t beste met ôôns vuur hebt. Zô gauw at de stemm’n e telt bint, springt ze oaver hun eeg’n schaduw. Één dinge, goat hen stemm’n. Gèèft duudelijk an wàj’ wilt. Doar völt ne hôôp te kiez’n. Wis en waarachtig.
De Vèèrkàànte Viefkop.
