Poas’n en Pinkstern völt nôôit op ’n zelfden dag. Det klopt, mà Pinkstern en Carnaval det geet, dit joar as alles good geet , vuur de èèrste kèèr gebuur’n. De Fienpreuvers bint zich an het vuurbereid’n. De nèurige vergunning’n möt nog erèègelt word’n, mà het lik ter op det het àmoal in kann’n en kruuk’n kump. Op zich möt det könn’n, het Hoolt’nse carnaval is neet gebund’n an de principes uut het Zuud’n. Het is à wal is eerder gebuurd det er in Hoolt’n carnaval was, terwiel het katholieke Zuud’n volop in de vast’n zat. Dus carnaval in het èèrste weekend van juni. Lekker zunnig weer, met onmeunig völle volk in t Darp. In de korte bokse op het terras, lekker lurk’n an een biertje. Wie loat het oaver ôôns hen kômm’n. Waw we ôk oaver ôôns hen loat goan en det is nog völle eerder, de gemeenteroadsverkiezing. Het warpt ziene schaduw al vuuruut. Het linkse kààmp hef zich inmiddels verenigd in, Samen Lokaal. Zelfs ôôns D66 roadslid hef zich ôôndergeschikt emaakt an het uutèindelijke doel, ne duudelijken vinger in de pap krieg’n. Ne duudelijken vinger. Het zôl wat det betreft ne goeie zaak wèèr as de rechter vlèugel ôk zoiets zôl doon, zôdet neet altied wier, ééne pertieje in het college zit en de ààndere helfte in de oppositiebàànk’n. Het zal ne weg wèèr um ne duudelijke voest te maak’n tèeg’noaver ôôns christelijke blok. Hoe het ôk mag goan, één dinge blif het allerbelangriekste, goat àmoa hen stemm’n. Wiej lèèft in ne tied, diet vuur völle mèèns’n moeilijk is en het zal nog wal een tiedje duur’n vuurdet wiej de schade, an e brach duur al die gedwung’n sluuting’n, wier te boam’n bint. Wiej könt er met mekaa wat an doon. De Fienpreuvers zet ne stippe op de horizon, duur het carnaval te verzett’n n noar Pinkstern. De politiek kan ôôns veerder help’n, um doar woer ’t mèugelijk is, mekaa biej de hàànd te nemm’n. De stippe op die horizon is 16 meert, dan wördt de politiek vuur de kômmende vèèr joar wier in beton egött’n. Het weer is nog een betje triesterig. Gelukkig kan der al iets meer as an’t begin van t’joar, mar het is te wèinig. Loaw we hopp’n det de zunne meer en meer de oaverhàànd krig, met vuur iedereene ne goeie verkiezingsuutslag, een zunnig carnavalsfeest en het allerbelangriekste, alle vriejheid um te doon en te loat’n wàj’ wilt. Het möt könn’n, want in Hoolt’n kan alles.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
