“Wiej zet ’t nog wal èèm’n in de kràànte”, zô wörd’n der e zeg op ne vergadering. In wat vunne kràànte köj’oe ofvroag’n. De Hoolter kràànte? Nee, den is vôt. De vervanger zôl weer, de gratis huus an huus kràànte, West Twente! Zôl weer, zô heiw we, as hôôndstrouwe lèèzers, in ne brèèf van’ uutgèèver, duur e krèèg’n. Noe wi’k nog neet drek zegg’n det het klach’n rèèngt, mar één dink steet as ne poal boam’n water, in’ Diekerhook en in’ Bèusebarg is e neet bezörgd. Ie könt ter dus vergif op in nemm’n det alle buut’ngebied’n de klos bint. As gerösstelling vuur de Bèusebarger, het carbid scheet’n hef ter in.e stoane. Volgens betrouwbare bron hef iedereene rech op West Twèènte, dus aj’m ech wilt hemm’n, bell’n. Aj’ die kràànte duurkiekt, kôm ie, ofgelôôp’n wekke, neet veerder as 16 bladzied’n en der stun mar eene Hoolter advertèèntie in. De leste Hoolterkràànte had nog vèèr’ntwintig bladzied’n. Het lik gen vuuruutgàànk. Misschien kump het nog, het joar is ja net begun’. Trouwens op gen eene bladzie van die Hoolterkràànte heij’ kön’ lèèz’n det het ’n allerlest’n was. Gen èènkel tèèk’n van respek noar al die lèu diet in al die joar’n, doar zô völle tied in hebt e stökk’n. Schàànne,schàànne, dreijdubbele schàànne. Hoe neumt ze det toch ôk à wier, kôôle senèèring. Blif het prebleem woe we hen möt met het Hoolter niejs en de Hoolter advertèènties. Doar is nog kèuze uut typisch Riess’n Hoolt’n en het Riessens Niejsblad. Mar ik begriepe uut de môônd van de lèu , dat die ôk neet oaverà bezörgd wordt. Dus Hoolter aj’ oen niejs of oene advertèèntie in de kràànte wilt hemm’n, möj’ good uutkiek’n vuur wie oj’ det doot. Vuur de Diekerhooker is ter ôk nog nen mèugelijkheid um het in de Battemse kràànte te zett’n, want den veuilt doar alle wekke in de busse. Veerder blif het koffiedik kiek’n. Misschien kump ter toch nog wier wat ààns. Doar war’n geluud’n op de mark vuur’n viskroam, det ter misschien wier één of ààndere Hoolterkràànte zôl komm’n. Touw e gèèm’n, hèèl arg duudelijk was ’t neet, mà de komm’nde tied zöw we de ontwikkeling’n stark bliem’n volg’n.
Hèèl wat ààns, ie könt oe stemme vuur de gemeenteroadsverkiezing’n noe al uutbreng’n op de digitale kràànte van West Twèènte. Gelèuft ‘t of neet, de VVD had in ne tuss’nstàànd, 43 precèènt van de stemm’n, het CDA 21, de PvdA gen eene en Gemeentebelang, zèume. Det belöf wat, vuur wat het weert is, wiej blieft’ volg’n. Wis en waarachtig.
De Vèèrkàànte Viefkop.
