Kàànt in de warre wörd’n Nederlàànd dôônderdagmänn’n wakker. ‘N hèèl’n oamd wadd’n de lèu oavervôôrt met niejs oaver de gemeenteroadsverkiezing. In het leste debat op de tillevisie wörd’n de winnaars filstèèrt en de verleezers gaff’n an det ze op dezelfde weg duur gung’n. De PVV was ter neet, mà ja die had ôk mar in twei gemeentes met e doane. In een café in ’n Haag heul de PVV-roerganger de stamgast’n vuur, meer of minder Marokkaan’n en det wörd’n neet of e doane as caféproat. Het gung ’n ààndern dag neet meer um de gemeentes, het gung um discriminatie. Minder Marokkaan’n of minder criminele Marokkaan’n, het gung der neet umme wat er bedoelt wörd’n, mar um wat er e zeg was. Het onmeunige verlees van het kabinet wörd’n der duur verdôônkeremoand.
Gen cèènt meer noar Griek’nlàànd en àmoal duuzend euro der biej. Zô haal’n de VVD, biej de kamerverkiezing, völle stemm’n vôt an de rechter kàànte. De premier van ôôns làànd lach’n alles weg toen e de stemm’n éénmoal in de tesse had. De gewone man gaf nog één kèèr ziene stemme an de PvdA, in de hoppe, det ze der wieze dinge met zôll’n doon en de VVD neet veerder kon regèèr’n. Het hèèle làànd wörd’n stille toen de VVD en de PvdA met mekaar binn’n de kortste kèèr’n een kabinet in mekaa timmern. De Heer’n wadd’n de enigsten diet dach’n dat det de wille was van het volk. Die dach’n op hun buurte, dit nôôit wier. Moandenlàànk zag ie ’t in de peiling’n. De VVD en de PvdA krèèg’n een onmeunig moal kleppe. Alle andach gung echter uut noar de PVV. De hèèle kamer wil der gen gedoon meer met hemm’n. Een miljoen Nederlààndse PVV-ers krabt zich achter de oor’n en vrög zich of, biw we wà good bèèzig, noe haalt e wà bakzeil. À tien joar wördt diss’n PVV-er zwoar beveiligd umdet e zien lèèm’n neet zeker is. Hij is uut het Catshuus weg e leup’n, noadet e twei joar hef saam’n e doane met de VVD en het CDA. Hij was vuurgood uut e kakt. Het is ôk neet makkelijk àj iedere kèèr in caféproat zegt, waj’ der van vindt en hoej’ der oaver dèènkt. Hij kon völle better zegg’n, ik kappe der met. Ie vroagt oe dan ôk of woerumme of e nog vedan dut. Is det vuur zichzelf of vuur ziene kiezers? Hij breg de lèu in de warre. Hij röp wat en drèèjt neet. Het ettert zô wier vedan. D66 zeg noe, ie möt de PVV anpakk’n en neet negèèr’n. Doar völt wat vuur te zegg’n. De lèu van Leefbaar Rotterdam wordt noe ôk bedreigd. Hoe langer hoe meer raak ie in de warre. Wat möw we? Opsporing verzocht van de buis haal’n? Iedereene met een Nederlàànds paspoort mag bliem’n in dit môôie làànd, mà lèu diet oaver de strèèpe goat, dus crimineel’n, die meugt bes word’n an e pakt, mà dan duur de rechter. Wis en waarachtig.
De Vèèrkàànte Viefkop.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
