Een bezunder man. Jan Pakkert. Hij wörd’n geboor’n in 1773, as zönne van Berend Pakkert en Esseltien Meijlink op de Katerstede “De Pakkerij”. Hij was van lèège komof, mà blek een pienter männeke te weer. Al in 1804 wördt e neumt as ambtelijke getuuge. In det zelfde joar wördt e beneumd as plaatsvervangend schout van Battum. Een joar later trouwt e met Harmina Teunissen Groot Bronsvoord, een dèèrntje uut de vuurname boer’nstàànd. Hij blif boer’n op de pachtboerderieje van zien oolders. Op 8 meert 1811 maakt e promotie en is e provisoneelen Schout van Hoolt’n en Battum. Det verààndert op 28 meert à wier, dan is de maire van Battem en kapitein van de Landstorm. Het leg ‘m gen windeier en in 1815 kan e ziene pachboerderieje kôôp’n. In 1815 wördt e as eenigsten boer beneumd tut lid van de commissie van landbouw in Oaveriessel. Alle àànden wadd’n regèènt’n, van adel of grôôtgrôôndbezitters. In de tied det e schout was, wadd’n der wèinig bevoegdheed’n. De mach lèè biej de Provincie. Pas in 1825 krèèg’n de börgemèister en de assessoor’n (wethoolders) iets meer te vertell’n. De gemeenteroad zat er nog altied een betje vuur spek en bôôn’n biej. Noa de Fràànse tied, in 1816 wördt beslött’n det Hoolt’n en Battum één schout kriegt. Hij sollicitèèrt, saam’n met Jan Vincent uut Hoolt’n. Jan Pakkert wördt beneumd en Jan Vincent wördt de sikretaris. Het schient det er nog à wat gehakketak oaver is ewes, want pas noa 28 juni 1818 tèèk’nt e ziene brèève met schout van Hoolt’n en Battum. Ne saam’nvoeging met Battum is ter neet ekömm’n. Pas in 1825 wördt de titel börgemèister in evoert. Jan Pakkert blif börgemèister van Hoolt’n en Battum tut 24 april 1834. Hij was ne börgemèister dent arg betrökk’n was biej de armlastigen. Hij zörgd’n der vuur det er collectes wörd’n eheul’n biej overstroming’n en ôk biej de grôôte bràànd in 1829. Geerne wol e ne wèèverieje opzett’n. Het lukt’n neet. Wel kwam der in Hoolt’n in 1835 ne wèèfschoole, al of neet duur zien touwdoon. Hoolt’n wörd’n bestuurd vanuut de Pakkerieje in Battum. In die joar’n stun der ôôndermeer op de agenda, klacht’n oaver het trugge lôôp’n van de umzet in verbàànd met de anleg van de nieje weg in 1823. In 1818 vergadert Schout Pakkert in Hoolt’n. Hij wil meer geeld. Hij krig opslag ,f 425,00 per joar en de gemeenstesikkretaris, F 200, 00. Assessor Helderman weigert te tèèk’n. Hij vindt det e net zô völle wark hef as de sikretaris en hij krig ter niks vuur . Ie zeet, ôk toen wörd’n al esteggeld oaver geeld. Jan Pakkert is estörm’n in 1848, 75 joar ôôld.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
