Ja det is het, ie hôôlt er van of ie hôôlt er neet van. Vuur twei moand trugge kon der niks, alles op slot duur de pandemie. De Fienpreuvers last eur feesje vuur de tweede kèèr of. Met de elfde van de elfde wadd’n ze nog net tuss’n de rèègeltjes duur eglipt, noe konn’n ze neet ààns as oflass’n of uutstell’n. Het wörd’n het leste, mà het zôl toch ààns goan as verwacht. Vandaage, vriejdag, 25 februari, is alles wier vriej. In het Zuud’n barst het feest der zotten lös. De horeca haalt opgelucht oasem. Net vuur carnaval meugt ze in Hoolt’n ôk de tèènte wier lös doon. Prompt wordt er duur de kasteleins carnavalsfeesjes georganiseerd. Het zit noar dikke vieftig joar in de genen. Het möt gebuur’n. Volgend joar, viem’nvieftig joar carnaval in Hoolt’n. Ne machtige geschiedenis met illustere Hoogheed’n en greuistoep’n. Was het in die late joar’n zestig nog mar één’n oamd met een verklèèdfeesje, het zôl neet lange duur’n of de èèrste optocht trök duur Hoolt’n. Drei waag’ns, ôônder anvoering van Prins Johan kwamm’n de slöttel ophaal’n biej de börgemèister. De notabel’n zagg’n het die èèrste joar’n ech neet zitt’n, mà het blek al gauw det dit een hardnekkig virus was. Was het èèrs nog een köppeltje voetballers, al gauw wörd’n de buurtschapp’n en de clubjes der biej betrökk’n. Noe is het hèèl normaal det de kuuring van de waag’ns à begint op de woensdag. Op Dôônderdag wördt de slöttel op ehaalt op biej het vuurmalige gemeentehuus, noe de ôôldheidkamer, woer het ôôit àmoa begun. Op zoaterdag hèèl Hoolt’n op zien kop, met nen optocht, woer duuzenden noar komt kiek’n. Feest in alle kroeg’n en zô geet het drei daag’n vedan. Dit joar zal het stiller weer. Hoolt’n is vuur èèn joar gen Keunedarp, mar in de cafees zal zo hier en doar wal een feesje word’n eheul’n. Het Fienpreuversfeest is verschèum’n noar juni. Lekker in de korte bokse, geniet’n van de optocht. Met een biertje en ne bal gehakt op een terras of boam’n op de waag’n, zing’n en zwaai’n noar al het volk langs de weg. “Hoolten det is mien pleatske”. Ôôndertuss’n zeet wiej Ruslàànd de Oekraiene intrekk’n, det zal toch neet veerder uut de hàànd lôôp’n? Loaw wiej hopp’n van neet. Wiej goat vuur een ongedwung’n feesje in de zommer. Ie möt er èèm’n ingreui’n. Vuur ôônze jeugd is det neet zo moeilijk en de euldern möt zich mar inschikk’n.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
