Vanof Loarne zeej’ in de veert’n de boerderieje van Liez’n Jehan. Veerder her en der verstrèuit nog wat boerderiejkes, mà gen niejbouw. Ie möt vedan rie tut Broer van Sens vuurdet de bebouwing langs de eene kàànte van de weg in de Haar begint. Hij hef nog vriej uutzich oaver ‘n Geurd’n. Schuuns tèèg’noaver ‘m zeej’nog de spoor’n van kepot geschött’n huuze. Mien’n weg geet vedan tut Jan van de Meester en Diessenplas. De Hôôge Stèège in. Links de huuze van Westerik en ten Dam en en an de ààndere kàànte, langs de boerderieje van Sprökkereef en het doktershuus van Nagelhout, klim ik noar boam’n. Rechtsof köj’ de Zoerbarg in en linksof, oaver ‘t Boschkààmpspad, op de karke an. Ik trèè vedan langs de arm’nhuuze en zee in de veert’n de möll’nstôômp van Bouwhuusmölle. Boam’n um de bôch hen den grôôt’n linnebôôm biej Snies en het winkeltje der neuis, ôk van Snies. Rechtsof de Noord’nbarg in tut biej Rouw’nhors en Slotman, de Riessenseweg op. Rech vuur miej het huus van de Kuule, de Waerdenborch. De restant’n van het ôôle kasteel bint nog verbörg’n in de weiregrôônd. Tussen de bèume duur kiek ie oaver Voorsboerskààmp. ’N dikk’n Steen lig nog biej de uutspanning van het café, iets veerder. Biej Ab Jààns’n en de Smid van de Kol, de Kolweg op. Hèèmoa niks, gen huuze. Ie möt tut an de HJ Wàànsikstroate. Dan zeej’ de èèrste niejbouw van Hoolt’n. Vuur daj der arg in hebt binj’ biej Te Veele zien’n Jehan de weg oaver, langs de kark’nbèume, scheet ie biej Veeldhuus en de kampèèrboerderieje een smal pad in, met ne meters hôôge hegge. Ie bint Hoolt’n à wier uut en goat veerder vedan tuss’n weid’ns en prikkeldroad, op ’n Vlis an. Niks gen huuze en gen schoole. ‘n Geurd’n is nog schilderachtig môôi, met kleine boerderiejkes, smalle zààndweggetjes en kark’npeadjes. Rech vedan kom ie uut biej Morssink en de Zwarte Pette. Wiej goat rechtsof in de richting van Köllink en Reilink. ’N Stoomtrein kump net anpuff’n vanof Dèimter en löt Hoolt’n achter in ne grôôt’n pluum van rôôk. De weg noar Köllink is onmeunig slech, doar mônn’n wal ongelukk’n van kômm’n. Veilig kôm e wiej an biej Berhard van de Tol en goat rechtsof Hoolt’n in. Vanof het “Hôôge Einne” binj’ in Hoolt’n zelf, doar woet vlakbiej ôôit den grôôt’n bràànd is begunn’n. Langs de boer’nleenbàànke en de oop’nbare schoole drèèje wiej linksof de Stationsstroate op, vuurbiej Rehoboth, de Christelijke schoole en de melkfebriek, langs het station, de bôch duur. Links de Woage met rechts het café en het slachhuus. Doar binj’ Hoolt’n à wier uut. Ik nemme het smalle pad langs ’n ôôld’n karkhof. Links van miej zee’k, op de lôôze van Lindenbarg met grôôte letters stoan, “Bid en werk”. Good uutkiek’n vuur daj’ der arg in hebt zit ie in ’t prikkeldroad of in de hegge. In één kèèr stoa’k wier mill’n in darp biej de karke, biej Holterman. Wis en waarachtig, Hoolt’n was klein.
