Het had al in alle kràànt’n estoane. Carnaval barst lös in Markel. En det klopp’n, de Hooltense Fienpreuvers wadd’n in het Markelse, biej manege Snorrewind. Carnaval vuur mèèns’n met ne beparking. Noh, doar was niks van te mark’n. De gast’n zatt’n vol ongedeuld te wacht’n op het bôônte gezelschap. Met het noar binn’n bloaz’n duur de Brààndheultjes, leup de zaal, onder anvoering van Prins Hens van Kalverderk, nog veerder vol met vieftig pett’n. Hoe zô beparking? Nog gen half uur later gung de wethoolder en de Börgemèister vuurop in de polonaise. Zie wadd’n der. Hoe zô beparking. Het is à wier viem’ndartig joar elèène det Prins Jan Andries (Jan Schuchard) vuur de èèrste kèèr met de Fienpreuvers noar de manege kwam, um disse mèèns’n ne plezèèrigen middag te bezörg’n. Een schot in de rôôze, het blik ieder joar een hèugtepunt te weer in de beleaveniss’n van de prins. Vuur een antal van de feestvierders was het de zess’ndartigste kèèr, det ze dit feesje môcht’n metmaak’n. Onbezörgd stund’n de artiest’n te playback’n vuur de microfoon. De schik wörd’n nog grötter toen de prins en de adjudant leut’n zeen det ze zelf ôk merakels konn’n zing’n.
De Prins had ne goeie bujje en strèui’n riaal met medailles en netuurlijk de joarlijkse ondersteuning van 222 euro vuur de Stichting. An het eine van de middag krèèg Ronnie ten Have de wisselbeker vuur de best verkleede artiest. Ronnie was ter superbliej met en leut de iedereene vol trots de beker zeen. Noa het afscheidsconcert, woet iedereene, ôônder begeleiding van de onvermeuibare Brààndheultjes, op pann’n, deksels en àànder kökk’ngerei môch sloan, kwam der an diss’n bezundern middag een èine. De bezeukers wörd’n netjes noar huus ebrach en een half uur later gung’n de pett’ndrèègers, met anhang, richting Diekerhook, um te geniet’n van ne geneuglijke moaltied. Ankommenden zoaterdag zölt Prins Hens van Kalverderk en adjudant Zum Wolthaus vuurop goan in de carnavalsoptocht van Keunedarp. De jeugd van Hoolt’n zal zich, noar moanden van vuurbereiding, loat’n zeen an de de rest van de Keunedarpers. Preuft er van met, want um met de woord’n van de Prins te eindigen, wiej doet ’t samen.
