Hoe is ’t mèuglijk. D66, CU en SGP helpt ôôns làànd uut de naarighèid. Àmoa môôie kedootjes, vieftigduuzend nieje baan’n! Het zal miej beniej’n wat het geluud wördt in de tweede kamer. Wiej wacht het mar of. Vuur det de blaa van de bèume bint kan der nog wier ne hôôp verààndern. Vuur gewoone starveling’n is ter gen töuw an vaste te knupp’n. Wie wèèt, besteet het nieje college van ôôns darp, oaver ’n half joar, wal uut dezelfde pertiën. De pertiën timmert nog neet ech an de weg, loat stoan an een niej Riesner kabinet. Ôôndertuss’n hef ’n harfs keihard touw e sloane. De tied van de harfsmarkt’n is an e brökk’n. Wat denk ie van de ôôlde markt’n as Dèimter kôôle markt, het Oener koefeest, de Wierd’nse Zunematt’n. Zie hebt één dinge gemeen. Zie bestoat neet meer. Met piene in’t harte dèènk ik ter an trugge. Doarumme goa ‘k de leste joar’n geerne noar de peerdemarkt in Zuud Loar’n. Het bint neet àllèène de peerde, mà die oôle sfeer diet er is. Ie zeet het näns ààns meer. In lange rieg’n schoeft de kôôpers en kiekers, oaver de bemestte stroate, tuss’n de peerde duur. Het is uutkiek’n, want vuur daj’ der arg in hebt heij’ ne klap van zô’n peerd te pakk’n. Het is onbegriepelijk det mooders met kleine kinder zich in die drôkte woagt. Disse wekke is ’t wier zô veer. Zes uur löp de wekker of en um zèum uur gauw we, met sloaperige köppe, op noar Zuud Loar’n. Zô gauw aw we de èèrste kreuime in zich hebt, wördt er parkèèrt. Biej het begin van de peerdemarkt wördt er of esprökk’n, hoe laate ow we op huus an goat en dan duuke wiej ôônder, tuss;n de keerls met grieze en greune marktjässe. Noar de èèrste ronde wördt er as ôôndergrôônd ne deftigen gebakk’n vis noar binn’n e warkt, um doarnoa ne vèèschure in te duuk’n, woet ze arwt’nsoep en koffie verkôôpt. De lôch van peerdestrôônt vermengt zich met die van arwt’nsoep en dôôd bier. Het gelach is neet van de lôch. “N èineke veerder kump een stel opschötteling’n boam’n water. Zie hebt er à nen hèèl’n nach op zitt’n. Met völle lawaai en wàànkel op de beene zeukt ze eur weg tuss’n de kreuimkes. Mèu van het rôônd sjouw’n zeuke wiej de gezellighèid van de kroeg. Grôôt fees biej Beernd Botje. De èèrste peerde bint à lange op huus an aw we mekaa wier treft. Nog één kèèr langs de kreuime, trek e wiej ôk wier noar het Hooltense. Grôote tass’n met banaan’n, droem’n, wörste en Zuudloarnse boll’n wordt met e nömm’n, um de vroole tevrèid’n te hôôl’n. Het is bienoa vuur niks. Zô komme wiej biej ôôns buske en vuur daw we good en wà Zuudloar’n uut bint is de helfte al ôônder zeil. Mooi, aj’ der van hôôlt, mà ie zölt een joar mönn’n wacht’n. Ech ne kèèr doon, wis en waarachtig.
De Vèèrkàànte Viefkop.
