Doar is lange an etwiefeld, wal of gen Kèunefeesten dit joar. Van de wekke zagge wiej de bericht’n biej Hoolt’n Extra. Doar kump dit joar wier een Kèunefeest. Het zal ààns weer as ààndere joar’n. Een stuk klèiner, gen tèènte, mar zeil oaverkapping en parasols. Gen passe partouts, mà vuur alle daag’n een apart kaartje kôôp’n, ôk vuur de wichter. Zôônder geeldige qr-code of testbewies kom ie der neet in. Kaartjes kôôp’n kan àllèène via de computer. Lèèst er de bericht’n good op noa. Vuur sommige lèu betèèk’nt het, det ze meerdere kèèr’n möt test’n. Met name vuur de euldere generatie, een hèèl gedoo. Één kèèr op het terrein, kôm ie der neet wier of, vuur dàj’ noar huus hen goat. Ie markt wà, det het nog ne hèèle rèize is um der te kômm’m. Lèèst doarumme op tied de bericht’n good duur, um gen gedoo an de kassa te krieg’n. Doar wilt ze gen gemekker. Oh ja en doar meugt er mà 750 in. Det lik völle, màr pas op, zô ‘k à zèè, één kèèr buut’n het feestterrein, dan möj’ op huus an, ie könt neet wier noar binn’n. Petje of vuur de organisatie, zie stekt er eur’n nekk’n vuur uut. Het glas is half vol of half leuig. Loat wiej hopp’n det het een grôôt succes wördt. Vuur het hèèle programma möj het niejs bliem’n volg’n. Vuur de lèu diet het glas half leuig zeet, komt er nog à wat gedacht’n noar boam’n, Gen borreluur vuur bedriem’n en gen drèèimölle of kop van jut. Hoe möt de wichter zich toch vermaak’n? Het weer kan vèèr daag’n rèèg’n gèèm’n of het kan starvenskôôld word’n. De àànderhalve meter màj’ op het terrein lösloat’n, mà corona is nog altied ôônder ôôns. Blieft vuurzichtig. Vuur de lèu, woerbiej het glas half vol is, natuurlijk, Kèunefeest, Beeregezellig. Maximaal vèèr daage geniet’n vuur kinder, jong en ôôld. Machtig môôi weer en een feest um nôôit te vergett’n. Loaw we het doar mar op hôôld’n. Keunefeest, vuur de èèrste kèèr in 1991, met op vriejdag ôônder meer, Harm uut Riess’n, Gait uut ’t Klooster en Gert en Hermien Timmermans. Op zoaterdag Kèunebloasfestival, Piet Veerman en John Spencer en natuurlijk op zundag, Frühschoppen met de Eschlander en de Lutter muzikàànt’n. Dartig joar Kèunefeest’n. Woer blif de tied?. Zie geet vedan. Kèunefeesten, blieft er van geniet’n, pas as ’t er neet meer is, begin ie het te miss’n.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
