Machtelôôs zit ie der noar te kiek’n. Wat er steet te gebuur’n? Ie heurt ne stemme zegg’n ,at de helicopters in de buurte bint, is de de dôôd dichte biej. Dan gôôit ze wat uut het vliegtuug. Vrolijk komt de pakketjes noar beneed’n dwarrel’n en dan in één kèèr, nen onmeunigen knappert, rôôkwolk’n, spiekers, dôôd en verdarf. Gruuwelijk, in naam van….Honderd en vieftig duuzend dôôi’n in Syrië. Hoe völle möt er nog biej kômm’n? Hoe völt det op te löss’n? In Genève zèèd’n ze, det de wichter en de vroole vriej môgg’n vertrekk’n, mar ôk disse kèèr wier völle jonge kinder diet het slachtoffer bint. Àj’ de heer’n belustert hebt ze resultaat’n. Precies, barre wèinig, gruwelijk en zie zit er àmoa met drèuge ôôg’n te oaverlegg’n. Loat onscheuldige börgers vertrekk’n! Àj’t doar in naam van ,à neet oaver eens könt word’n, hooj’ hèèmoa neet veerder te proat’n. Syrië, een smeerzooitje, moeilijk op te löss’n. Gruuwelijk, mà neet uutvech’n, in naam van ,oaver de rugge van vroole en wichter. De narighèid stroomt alle daag’n vanof den beeldbuis de huuskamer in. In Midden Afrika slacht ze mekaar as arme dèèrs of, met messe en stökke. Ôk doar geet het in naam van…., gruuwelijk. Körter biej huus, blik in één kèèr det, binn’n de Europese Unie net zô völle corruptie is, as det de begrôôting grôôt is. Honderd en twintig miljard an smeergeeld en met zèumhonderd man zit ze der biej te kiek’n. Gruuwelijk, vinj’t gek det de lèu zich meer en meer ofkèèrt van Brussel. Het is wier verkiezingstied en de môôie preuitjes bint neet van de lôch. ’N een’n kump met een rapport en nen ààndern met ne zelf gekèuz’n börgemèister. Doot ze det noe vuur de lèu of vuur zichzelf. Ie vroagt oe vertwiefelt of, wat woar is en wat neet. Dôôdmèu woj’ der van. Premier Rutte geet, net as altied, lachend op reize, gruuwelijk, in naam van… Loat e astebleef goa vuur hàandel en warkgelèèg’nheid. Loat e neet àllèène beneum’n wat er in Ruslàànd neet good is. Ne al te grôôte bokse zakt oe rap op de kneene en doar kom ie neet met vuuruut. De koning en de koneginne goat in naam van Oranje. Gruuwelijk, gruuwelijk môôi zôl ‘t weer at Maxima ôônz’n Mark hôôge um ’n nekk’n hen zôl vleeg’n, vuur nog ne kèèr goold op de 1500 meter. Het zal toch neet woar weer? Gruuwelijk het zal toch neet woar weer, det Sven wier ne verkèèrd’n wissel maakt, umdet e te völle noar Maxima kik? Gruuwelijk môôi, Olympische Spelen, neuis al die gruuwelijke dinge. Loaw we hopp’n op môôie sport en gen naarigheid vanuut den hook van de wèèreld. Inmiddels maakt de plaatselijke politici zich massaal op vuur de gemeenteroadsverkiezing. Ôk hier geet het in naam van…, gruuwelijk spannend àmoa. De sporters wèèns ik gruuwelijk völle succes en de heren politici, wieshèid, gruuwelijk völle, in naam van….., ie vult het mar in, wis en waarachtig.
De Vèèrkàànte Viefkop.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
