Vuurig joar zagge wiej ze in Kroatie. Een Amerikaans echtpaar. Zie leup’n à tèèg’n de tachtig. Zie kwamm’n hèèmoal uut Californië. In de joar’n vieftig vanuut Hollàànd emigrèèrd. Het was ze vuur de wind e goane. Eur kinder uut e zwarmt oaver de hèèle wereld, ôônder meer ééne in Duutslàànd en ne dochter in Hollàànd. Op één van die oamde kwam e wiej in gesprek oaver Obama. Vuur ôôns geveul de beste president’n diet Amerika had e had. Het was of e duur ne wespe stökk’n wörd’n. Hij had warkelijk gen good woord oaver vuur disse man. Hij had Amerika verkwàànselt en meer verhaal’n van disse strekking flustern ne miej in de oor’n. Verhaal’n diet wiej hier in de kràànt’n nog nôôit hadd’n könn’n lèèz’n. Het mag duudelijk weer, zie wadd’n Republikein’n. Het verhaal blèèf in miene gedach’n rôôndspook’n. Toen Trump tut president wörd’n e kèuz’n, was de wereld hier te klein. Ie zagg’n ôônze politici op het Malieveeld. Zelf hè ‘k ‘m um e vroag’n, woet e dach oaver de verkiezing van Trump. Hij was bliej det Trump had e wunn’n. Hij wèès miej op de beurs van New York, diet à twintig precèènt hèuger steet sinds Obama. De Democraat’n, volgens hem, de pertieje van ’n armood en verslaving, is onmeunig helg en prebèèrt Trump het lèèm’n zô zoer mèugelijk te maak’n. Nemt de minister van ôônderwies. Wiej heur’n àllèène mà kritiek op Betsy de Vos. Hij is enthousiast det zie het ôônderwies wil verààndern, zôdet de Roomskatholieke, Christelijke, Moslim en ààndere vrieje school’n wordt betaald duur de regering. De school’n in Amerika bint volgens hem van lèèg allooi, umdet die school’n noe meer intresse hebt vuur het personeel dan vuur het ôônderwies. Op disse meniere leert een hôôg percentage leerling’n, volgens hem, nôôit wat. Hij neumt het verslaafd weer an de Democraat’n. Hij eindigt er met det Obama tien triljon dollar hef touw e voegt an de Nationale schuld en det vuur 30 precèènt lèu, diet neet hooft te wark’n en alle wekke geeld kriegt vuur lèèm’nsôônderhôôld. Ja, det lèès ie neet in de Telegraaf en de Volkkràànte, zô eindigt e zien betoog. Of het àmoa woar is loa ’k in ’t midd’n. Hij eindigt met te vertell’n det 56 precèènt van de Amerikaan’n der zô oaver dech. At Trump der in slaagt um det de kommende vèèr joar te verààndern, dan wördt e in 2020 wier e kèuz’n. De democraat’n zölt alles prebèèr’n um ‘m te loat’n struukeln. Ie möt Trump oaver twei tut vèèr joar bekiek’n, zô geet e veerder, as ter dan nog vrèè is, want Europa zakt rap weg, met de immigratie van zôvölle Moslims. Van de wekke krèèg ik wier een berichje. Hij gaf ôônz’n premier Rutte de kôômpelemèènt’n det e de Turkse regering in de kôônte hef e schupt. Det hadd’n ze à tien joar eerder mönn’n doon. Wiej zölt zeen woet het àmoal op an geet. Wis en waarachtig.
De Vèèrkàànte Viefkop.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
