Wiej zit nog mà ne dikke wekke vuur de Karsdaag’n. Ech winterweer is ’t nog neet. Nog èèm’n en de kalender steet wier op januari. Zô gangswieze kômt de lèu tut röste ôônder ‘n Karsbôôm. Iedereene maakt ziene plann’n, iedereene hef zô ziene wèèns’n vuur het nieje joar. Het hef neet allèène met lèèftied te maak’n. Het lig ter mà net an in wat vun stadium of oen lèèm’n is. Ôônze allerkleinst’n wordt vuurbereid op den èèrsten schooldag. Weg ôônder de rökke vedan biej moo en dan geet ’t rap. Weg van de middelbare schoole, weg uut huus, op eeg’n beene, studèèr’n in plaats’n, veer weg. Hoe völle jonge mèèns’n wilt er neet geerne achttiene word’n, zôdet ze eindelijk op meugt goan vuur het riebewies. Al die jong’n diet het kommende joar vuur ’t èèrst hen dààns’n goat, eur èèrste vriendje of vriendinnetje hebt. In het nieje joar ’n sprôônk woagt, um te trouw’n of te hôkk’n. Jonge lèu woet de volgende generatie der an kump, hoe môôi kan het weer, pappa of mamma word’n of opa en opoe. Wier ààndern diet een feesje wilt gèèm’n, umdet ze viem’ntwintig, vèèrtig of nog langer biej mekaa bint. Netuurlijk ôônze allerstarksten, diet tachtig of zelfs nèèngtig hopt te word’n. Het is ne goeie zaak um plann’n te bliem’n maak’n. Biej al die feestelijkheden, lekker ett’n en een borreltje, möw we ôk èèm’n stille stoan biej die mèèns’n, woervuur het àmoa neet zô vanzelfsprekk’nd is, det ze fijne Karsdaag’n hebt.en een gelukkig Niejjoar. Mèèns’n, oaverà um ôôns hen, diet zeek bint, in spanning lèèft, of mèèns’n diet bange bint det het neet good geet met eurzelf of met de neuist’n. Mèèns’n diet nog in de rouw zit, of hèèmoal allèène bint. Kiekt um oen hen, pakt ze biej de schoolders of gèèft ze juust de ruumte um alles alles te verwark’n. Àj’ zô zit te prakkezèèr’n ôônder den Karsbôôm, kom ie iedere kèèr wier tut het besef in wat vun môôi làànd ow we meugt lèèm’n. Och ja een betje te völle stikstof en wat péfas. Een betje minder hard op de weg en wat minder duur de lôch. Het zal àmoa wà, mar àj’ oaver de grèènze kiekt, zeej’ völle meer armood. Wiej doot meer as ôôns beste, doar könt ze in ààndere làànd’n, biej lange noa neet an tipp’n. Wat det betreft zôll’n ze noar het ôôle sprekwoord van opoe mönn’n lustern, “Aj’ doot as ‘n ààndern geet oe ôk as ’n ààndern”. Doar dèènkt mar is een zetje oaver noa.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
