Het is good um te lèèz’n det de campings vol zit. Het is de leste tied ôk nog nôôit zô drôk e wes in Hoolt’n. Doar zörgd’n ôônze boer’n vuur, mà of det noe hèèmoa de bedoeling was, dèènk ’t neet. Het is verdômd lastig, àj’ noar huus wilt en ie möt uur’n wacht’n of kilometers umme ried’n. Doar wôj’ ech neet vrolijk van. Mà ja, het demonstratierech is heilig, of toch neet? In ’t Noord’n van ôôns làànd mag de boer’n wà demonstrèèr’n, mà möt ze de trekkers biej huus loat’n. As het dan mà good geet met die àànderhalve meter, at ze met duuzenden noar Den Haag of Amsterdam komt. Loaw we hopp’n det, noa de vakàànties, iedereene een betje tut röste is ekömm’n. Het is klein leed, àj’ zeet det het corona-virus oaverà in de wereld nog vedan woekert. Gelukkig heiw we det hier een betje ôônder controle, mà het blif griezelig. Oaverà in Uuropa bint er oplèèving’n. Ie hôôlt oen harte vaste, àj’ zeet det er volop e vleuig’n en efeest wördt. Àmoa lèu diet de zeekte zô mà wier met könt breng’n. Vakààntie in eeg’n làànd is, wat det angeet, zô gek nog neet en dan in september ôôns eeg’n fees, fees, knoronafees. Gen tèènte dit joar, mà vèèr middaag’n, ôônder grôôte zeil’n. Die zeil’n, det möt wà aans dan rèèng ie, biej wieze van sprekk’n, de tèènte uut. De hèèle Kalfstermanswèire kump vol met toafels en steultjes op àànderhalm’n meter. De feestvierders möt an de toafels bliem’n zitt’n. Kèunefeest, beere gezellig! De drankjes möt doar besteld word’n. Hoe ‘t precies möt goan, biej de toilett’n is nog neet hèèmoa duudelijk. Doar möt netuurlijk gen lange rieg’n ontstoan. Zie bint er duudelijk nog neet oaver uut. Ôk de gemeente dech met oaver een grôôt terras met muziek. Het is neet makkelijk, àj’ met een feesje möt bliem’n zitt’n en neet met meugt zing’n. Toch hef het wà wat. De patatboer diet rôônd geet met frikandell’n. De obers diet 450 man möt bedeen’n. Zie lôôpt zich de noad uut de bokse. Ja loaw we eerlijke weer, noa al die gemiste feesjes, heij’ netuurlijk dörs as een peerd. Loaw we de organisatie starkte en wieshèid wèèns’n, mà trugge noar den goochemen lockdown, ie möt er neet an dèènk’n. Maar noe èèrs vakààànsie en det is in Hoolt’n altied net iets langer as in ààndere plaats’n. Geniet er van, blieft gezôônd en dan op noar het feest, feest, knoronafeest.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
