Wiej hebt er ne poal biej. Ne hèèl’n bezundern dit kèèr. Twei kaale peute diet uut de grôônd komt greui’n. Stèèvige beene. Zôll’n ze die op marktplaats, op de kop hemm’n e tikt? Op ne foto in de kràànte steet de kunst’n maaker der hèèl serieus biej te kiek’n. Wethoolder Cornelissen dut net as offe het in Keulen heurt dôônder’n. Nen anwinst vuur Hoolt’n. Det is ôk neet zô gek, want op ’n poal steet Bennie Jolink. Zelf dach ik drek det de vuurman van Normaal, vuur de zôvölste kèèr, op ’n kop het zàànd was in e stoekt, mà nee, het möt ne vluchteling vuurstell’n den’t gen voot meer hef um op te stoan en wiej, armzalige Hoolter, diet de kop in ’t zàànd stekt. Ie bedèènkt het mà. Wiej möt het môôi vind’n en det zal ôk wa gebuur’n at de èèrste foto’s op het feesbook stoat, met ne café- of vakàànsieganger der op, diet al lönnend op de veute, good gemikt, tuss’n de peute hen spi-jt, op de klinkertjes vuur ‘m. Goat er àmoa hen kiek’n, dan köj der oaver met proat’n en zegg’n waj’ der van vindt.
En noe de beentjes de lôch in, det zölt ze binn’nkort vaste zing’n biej de rôôd zwarte supportersvereniging. Zie bestoat vieftig joar en doar möw we onmeunig bliej met weer. Vieftig joar e lèène, Hoolt’n was nog in deepe röste. Doar was iets bezunders an de gange. De Blauw witt’n wadd’n net op e richt en het rôôie vlaggeschip lèèr op koers vuur het kampioenschap. De generatie van de geboortegolf wörd’n môônnig. In Amsterdam rèur’n zich vanalles van nozem tut provo. In Hoolt’n zatt’n de supporters biej Kafstermans Mans in de kroeg. Zie wörd’n àmoa lid van de nieje supportersclub. De keerls, het bestuur van het èèrste uur wadd’n Eddy Vincent, Tox en Herman van de Leermèister. Het kan weer dà ‘k ter een paar vergette, mà het notulengetrouwe verslag loa ‘k oaver an de sikretaris. Het begun stormachtig. Hoolt’n kampioen in 67. De twei of drei elftall’n van Hoolt’n zôll’n uutgreui’n tut mà leefst darttiene, op het hèugtepunt. Supporters gung’n massaal met noar de uutwedstried’n, met nen rôôd zwart’n clown as mascotte. Hoolt’n zôl nôôit wier röstig word’n. In 1969 krèèg’n diezelfde keerls het kolderieke idee um ne carnavalsoamd te hôôld’n. Iedereene môs verklèèd kômm’n. Water Jan was de èèrste Prins en zôônder arg hadd’n ze ne carnavalsvereniging op e richt. De notabelen sprökk’n der schàànne van. Dit kon neet. De jonge lèu zôll’n der van an ’n dràànk kômm’n. Het is àmoa nog wà met e völl’n. Wat zeg ik duur de oprichting van disse supportersclub, köw we noe ieder joar geniet’n van een machtig carnaval en een ech Hoolter Kèunefeest. Doarumme jongs, duur goan met dit prachtige wark vuur alle jonge sporters. Mar èèrs, op 19 november, grôôt fees op Meermanskààmp. Vieftig joar supportersclub en noe die beentjes de lôch in, wis en waarachtig.
De Vèèrkàànte Viefkop.
