De leste twei joar bint wiej neet arg verwèènd. Alles is een betje verpest duur corona. Det möt noe mar is een kèèr of eleup’n wèèr. De jonge lèu möt uut könn’n goan en neet biej vaa en moo op de kökk’n zitt’n. De verjeuirdaag’n möt eviert könn’n word’n en toch wordt wiej wier e waarschouwt vuur det verdomde virus. Wördt het wier een joar van oflast’n en biej huus bliem’n? Gelukkig könt de wichter wier noar schoole. De rest zal nog èèm’n in de
wachtkamer mönn’n bliem’n zitt’n. Het is een hard gelag, mà toch, àj èèm’n trugge kiekt, was ter nog genog um van te geniet’n. De tied van de advent, alle wekke èèm’n de Barg op, um de duustere daag’n weg te bloaz’n met de midwinterhoorn. Geniet’n van det keerltje van tiene, dent net zien diploma had ehaalt en ziene zuuvere klàànk’n leut heur’n oaver het vlakke Sallààndse làànd ôônder ôôns. Op Karsmiddag de veer drèèngde klàànk’n loat’n golven oaver de eeuwige rustplaats van de jonge Canadeez’n, diet vuur ôônze vriejheid het lèèm’n hebt eloat’n, terwiel de schoolkinder de keerskes biej al die graav’n zett’n. Jammer genog kon der gen volk biej wèèr, mà het blif indrukwekkend. De advent is vuurbiej e vleuig’n. Gelukkig heiw we nog könn’n bloaz’n biej het carbid scheet’n. Zô jammer det er wier gen volk biej moch wèèr. Ôôlejoarsdag, allemachtig wat ne file op ‘n Beeld, àmoa in de riege vuur ne buul met olieboll’n. Het lek wà of ze vuur niks wadd’n. Ôk vuur de viskroam van Albert en Rikie van Reinaardus was het hatstekke drôk. De glühwein en de vishapjes gung der in as olieboll’n. Vuur de allerleste kèèr kôj’ ze an ’t wark zeen op ’n Smidsbeelt. Zie hebt een onvergettelijk ofscheid meug’n belèèm’n. Dag ôôle joar. Loaw we hopp’n det het vuur ôôns àmoa en vuur eur in ’t bezunder, een gelukkig joar mag word’n. Het geluud van de midwinterhoorns is inmiddels verstomd. Vanof Drei Koning’n hangt ze wier vuur een joar an de spieker. Het nieje joar, wat geet het breng’n. Ne niej’n visboer, wiej wèènst ‘m alle geluk en succes op de vriejdagmarkt. Det geeldt trouwens vuur al die marktkôôplèu. Het is wal is good um doar extra an te dèènk’n. Het “on line” kôôp’n haalt ne hôôp gezellighèid weg. Het nieje joar breg ôôns de verkiezing vuur de gemeenteroad. Wie goat ofschèid nemm’n van de börgemèister, mà tèèng’n die tied is het joar vaste à bienoa wier umme. Loaw we hopp’n daw we de zwoare “lock down” moatrèègel’n dan ôk vuurgood achter ôôns hebt eloat’n. Àmoa völle geluk in ’t Niejjoar en blieft gezôônd.
