Hej’ oe wal is of e vroag’n, wat de ech’n bint? Vaake bint er det neet zô völle. Ja, as ’t merakels good geet, dan zeej’ ze in één kèèr wier. Nemt de rôôd zwart’n, zie bint dèirdes e wörd’n en e promovèèrt noar de vèèrde klasse. Noe mà hopp’n det ze de èèrste vief wedstried’n volgend seizoen wint, dan hebt ze in één kèèr wier dubbel zô völle anhang. Het is zô, as ’t good geet, wil iedereene der biej heur’n. En dan ôônze Blauwwitters, zie doot volop met um promotie noar de tweede klasse en nog altied kan det lukk’n, mà dan möt ze wà met 3-0 winn’n, in de uutwedstried tèèg’n IJ.V.V. Het zôl môôi weer, vuur de èèrste kèèr, 2e klasse voetbal in Hoolt’n. Keerls, goat er vuur, spölt ze van de matte! Het zal gen mèènse ontgoan e weer, mà Gowhed is e promovèèrt noar de Eredivisie. Hoe is ’t mèugelijk. Zie bint zesdes in de èèrste divisie en dan toch, noa zèumtien joar, promovèèr’n. Iedereene wèèt det de Dèimter club an de Vetkampstroate spölt. Zie hebt een stadion, met 6000 plaats’n. Doar kônn’n de supporters de ofgelôôp’n joar’n met gemak in. Noe bint ze promovèèrt, duur de noacompetitie te winn’n en wat zeej’, in één kèèr stoat er meer dan vieftienduuzend man op de Brink, de voetbalheld’n an te moedigen. Dèimter is ontploft, mà gelukkig is ter niks verneeld.. Het is àmoa hosanna. Iedereen zweeft met ’n kop duur de wolk’n. Gowhed hef Dèimter wakker e maakt. Vanof disse wekke stoat ze hoppenlijk wier met bèire beene op de grôônd en blif de stemming net zô good as biej de huldiging. Of möj’ oe harte vaste hôôld’n as Ajax en Zwolle noar Dèimter komt. Kump ter dan wier nen ontploffing met puunhèupe in de stad? Wie wacht het of en zölt het beste der van hopp’n. In Dèimter is de geest uut de flesse. Hoe zôl het goan biej de Hoolter supporters van Dèimter. Doar bint er nog hèèl wat, diet eerder noar de de rôôd-gell’n gung’n. Zôll’n ze de weg noar de Vetkampstroate nog wèèt’n? Doar bint er ôk ne hàànd vol, diet al die joar’n trouw op Dèimter an bint e reist um te kiek’n noar de roemruchte club van Leo Halle. Det bint de ech’n. Loaw we hopp’n det Gowhed het kômm’nde seizoen eredivisiewaardig is. Loaw we hopp’n det de tribunes en nôôdtribunes mudjevol zit. Det er allèène mà voetbal is te zeen en gen gebek en gescheel. Det de held’n, diet tut halfgod bint promoveert, neet met pek en veer’n wordt verbràànd. Zelf nem ik miej vuur um miej is wier is te loat’n zeen biej de rôôd-zwart’n. Of det lukt, ik wèèt ’t neet. Het geet miej as zôvölle lèu, èèrs resultaat en dan pas kump de wille um der biej te will’n heur’n. Het möt eigelijk net àànsumme. Ie möt er altied weer vuur oen clubje, vuural in slechte tied’n. Wis en waarachtig.
De Vèèrkàànte Viefkop.
