Dôônderdagoamd was het zô veer. Noadet ze mekaa oaver en wier hadd’n traktèèrt op kedootjes, krèèg Prins Wonder de Barbier de slöttel uut hàànne van Opperkèun Hoflàànd. Doarbiej möj’ wal in ôôg’nschouw nemm’n det het zôônder Brààndheultjes ne hèèle stille bedoening zôl weer. Met as ôôndergrôônd een paar lekkere saucijz’nbrèudjes vertrök het duurluchtige gezelschap vanof de prachtig opgetuugde Ôôldheidkamer noar de oplèèvering van de Prins’nwaag’n. De Versierders hadd’n good wark e lèèvert. De Prins’nwaag’n zag ter merakels uut. Het enige wat nog tèèg’n kon zitt’n was het weer. De vriejdagmiddag gung het hèèle gezelschap noar manege Snorrewind vuur het carnaval van lèu met ne beparking. Het blif, vaste vuur Prins en Adjudant, één van de heugtepunt’n. Het wörd’n ne lang’n dag want noar de middagsessie en al het lekkere et’n biej Het Klavier, begun de Goodwilloamd. Hèèmoal onverwach leup de zaak van Niejkààmp vol met Fienpreuvers. Ingrid wörd’n terech in het zunneke ezet vuur al het wark wat zie hef e doane en dut vuur Hoolt’n. Zô gung het ’n hèèl’n oamd vedan. Een joarlijks feestelijk gebuur’n, ôônder anvoering van de onmisbare Brààndheultjes, woerbiej der her en der wal een treuintje wörd’n e loat’n. Het Bouwersfees hè ‘k an miej vuurbiej loat’n goan, want ’n ààndern männ’n môs e wiej der wier stoan, vuur jurering van de optoch. Gelukkig neet àllèène, met zien viem’n gunge wiej per Tsjoek noar de opstelling van ‘n optoch. Het goold’n Kèun was de èèrste waag’n die we tèèg’n kwamm’n. Den had toch wal een betje glààns verleuirne. Vuur de rest was de optoch kwalitatief hard vuuruut e goane. De strakke alcoholrègels zörg’n der vuur det ééne waag’n neet môch start’n en ééne wörd’n der uut e slött’n vuur de prieze. Niej-Hèèt’n, vurig huul’n det ze neet hadd’n e wunn’n, kon tevrèène weer. Zie namm’n völle môôie prieze met noar huus. Noa oflôôp was ter volop drôkte en plezèèr in Kèunedarp en det gung duur tut in de kleine uurtjes. De Prins en de Road van Elme môss’n zundags à vrog noar Hèet’n en Niej Hèèt’n. Zelf hè ‘k ne snipperdag e nömm’n. Moandagmiddag was het zing’n gebloaz’n met de Korhaan’n op het popfestival. Èèrs inzing’n biej Ab en later op het Vletgoar. Het weer wörd’n alsmà slechter. Gelukkig hadd’n de Fienpreuvers de catering good vuur mekaa. De recordpoging leup vuur miej kepot. Duur en duur nat kwam ik biej huus um nog, net op tied, an te könn’n sluut’n vuur de Battemse Biertapwedstied. Barre gezellig, de tied vleuig vuurbiej. In de schaduw van de wedstried krèèg Ab Jààns’n ne medaille van de Battumse Prins Beum, kleinzönne van Gouwe Ouwe Douwe, umdet e vuur de viem’ntwintigst kèèr met dèu. Netuurlijk, net as ààndere joar’n èèm’n noar Jootje en dan de busse miss’n. Gelukkig is ter dan altied wier een thuusfront den’t oe trugge breg in Kèunedarp.Het zit het ter op. Petje of vuur de Fienpreuvers. Zie hebt ôôns wier een môôi carnaval bezörgd. Wis en waarachtig, alaaf.
De Vèèrkàànte Viefkop.
