Honderden Hoolter bint à drôk gangs um van koneginnedag, de bevrijding en de herdèènking een bizunder gebuur’n te maak’n. Ôônder de vlagge van de SVNF en de WAV wördt ter vanals op töuw e zet. Woej’ àmoa an met könt doon is netuurlijk de versiering van de stroat’n en buurt’n. Dit joar in ’t bezunder die stroat’n en buurt’n, diet an de Candeez’nroute ligt. Kiekt doar vuur op www.canadezenroute.nl en ie wèèt of oene straote of buurte der an lig. In grôôte lien’n löp de route duur ’t darp, noar ’n Bèusebarg, oaver de Borkeld, wier duur ’t darp oaver ’n Hoolterbarg en dan duur Splôô wier op Hoolt’n an. Môch ie der noe neet anligg’n, gen nôôd, ie könt altied iets uutbeeld’n oaver den tweed’n wereldoorlog. Waj’ doot, doar biej veerder vriej in. Hoe meer of ter met doot, hoe better of ’t is. Wat gebuurt ter àmoal nog meer in disse daag’n. HMV zörgt ôônder meer vuur ne taptoe op koneginnedag. De MAC heult ne wedstried vuur ôôle motors. OCH spölt een machtig môôi oorlogsstuk, woer biej ’t neet drèuge hôôlt. De Hoolt’nse horeca betaalt ôôndermeer de brunch. Alle Hoolter könt vuur niks ett’n op de Kalfstermanswèire. Ie könt ne vrieje gift gèèm’n an het nieje informatiecentrum biej ’n Canadeez’n karkhof. Zie begint um elf uur en stoat met eur all’n biej de tèènte van de Fienpreuvers. Met mekaa zörgt ze der vuur, daw we gen honger en dörs hooft te liè. De Ôôldheidkamer pakt uut met ne tentoonstelling oaver de Hoolter Jödd’n en de bevrijding. Veerder drèèjt Kuns en cultuur, de film Oorlogwinter in Irene. Op vèèr mei is ’t dood’nherdèènking. Dikke zesduuz’nd man kump ter noar ’n Candeez’n karkhof, woerôônder Prinses Margriet met zien’ Pieter. Dèènkt ter umme, aj’ der hen wilt möj’ op tied een kaartje haal’n biej ’t VVV. Zôônder kaarte kom ie der neet in. ‘S oamds herdèènk’n in de karke en dan noar ’t monument op ’n Barg. Vief mei haalt de atletiek het bevriejdingsvèur uut Wagening’n. en drek ter noa is de bevriejdingslôôp. ‘S middags kump, keep them rolling noar de Kalfstermanswèire en zingt de Hoolter Dèèrns nog vuur ôôns. Het gehèèl wördt ’s oamds of e slött’n met vèurwark. De Canadeez’nroute is iets wat hèèmoa niej is. Um de honderd meter stoat ter vlagg’n langs de fiets- en autoroute. Vriejwilligers uut, ôônder meer ’n Bèusebarg en Splôô, zörgt ter vuur daj’ ôônderweg op twintig plaats’n stille könt stoa biej dinge diet in’ oorlog gebuurt bint. Biej ’t Padvindershuus wördt op 1 en 2 mei een Canadees kààmp noar e bouwt. Äns ôônderweg wördt ne film e drèèjt oaver de V1 en V2. In Splôô zölt de arbeiders wier lôôp’n biej het arbeiderskààmp en de Splôôse wichter zölt de bezeukers breng’n noar het Stevensmonument en het ôônderduukershol. Zô is ter nog volle meer. Het wördt môôi en nog volle mèuier aj’ zelf met doot, mà ôôndersteun’ mag ôk, SVNF, rekkening 328561894. Ik zegge, gewoon doon. Wis en waarachtig.
De Vèèrkàànte Viefkop.
