Met een onbestemd geveul stoaj’ vuur de roet’n te kiek’n. Gries weer, dààmpig en waterkôôld. Det rare geveul wò ‘k mà neet kwiet. De wereld is ààns as vuurig joar. Ôônze grôôte hoppe, Trump uut Amerika löt geluud’n heur’n, woet oe de oor’n van klappert. Angela Merkel uut Duutslàànd is stom e wes, det ze zôvölle asielzeukers binn’n hef e loat’n. In Amerika kump ter gen Moslim meer in. Engelàànd is hèèl klook e wes um uut de Europese unie te stapp’n. De Navo is vereulderd en möt word’n an e pakt. Europa zal mönn’n voldoon an het leed’ngeeld. Het lik ter stark op det Amerika met ààndere ôôg’n noar Ruslàànd geet kiek’n of zôl det mà vuur ne blauw’n moandag weer? Wat mörre wiej noe, wie hef ter geliek?. Europa wèèt eigelijk neet good wat ze der met an möt. Zie zit vaste in verkiezingsprogramma’s. De VVD wil neet saam’n met de PVV en de SP neet met de VVD en goat zô mà vedan. Noe bint ze gen één van all’n an de èèrste leug’n e barst’n, dus det kan ôk zô wier ààns weer. De verbrokkeling is grôôt. Disse wekke begint het nieje beleid in Amerika. Ie zölt zeen det de pertiën vanof den dag biejdrèèit um Amerika toch mà neet uut het ôôge te verleez’n. Wiej, as kiezersvolk zit er met. Hoe möj’ toch tut ne goeie ofwèèging komm’n um in meert de juuste stemme uut te breng’n. De stemwiezers könt oe help’n, mà brengt oe die biej oen eeg’n pertieë en bint die programma’s te vertrouw’n? Al disse dinge brengt een mèinse in de warre, ie wordt er hatstekke neerslachtig van.
Koffie.., èèm’n schrik ie op um zô wier duur te maal’n.
Laats wörd’n miej e vroag’n of ik wusse woerumme of kniepertjes der uut zagg’n as kniepertjes. Netuurlijk wus ik det neet. Kniepertjes wordt vuural e gett’n in de èèrste daag’n van het nieje joar. Det nieje joar wat dan nog een geslött’n book is vuur iedereene. Doarumme wordt die keukskes op e rolt as ne parkamèèntrolle. Dit joar kon die kniepertjes wal is eens zô grôôt weer as ààns, zô völle steet er te gebuur’n en te verààndern. Ie schrikt er van, àj lèèst det er ach lèu bint in de wereld diet met mekaa meer geeld hebt as de drei en half miljard armst’n op dissen aardbol. Woer möt det op an. Ie bangt oe, àj’ der an dèènkt det ze àmoa noar Europa komt. Ie verhelgt oe, àj’heurt det die ach man in verhoolding minder belasting betaalt dan al die arme sloebers. Loat det astebleef rap ààns word’n, loat al die depressies rap vôt trekk’n. Loat de zunne schien’n vuur iedereene, met een lekker temperatuurtje en een biertje op ’n Beelt. Het kan miej neet gauw genog goan. Gelukkig is het mar één’n dag in ’t joar, Blauw’n moandag. Loawe hopp’n daw we der gen ne depressie van oaver hôôlt, wis en waarachtig neet.
De Vèèrkàànte Viefkop.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
