Biej de Poppe rechduur

Àj’ van Hoolt’n kômt tenminste, ààns möj’ links of rechtsof, àj’ noar Markel wilt. Vuur völle lèu is ter disse wekke ne goeie reed’n um de nèuze in Markel te loat’n zeen. Netuurlijk àmoal op de fietse, want doar in Markel lèèft ze ôk neet op water allèène en det hooft ôk neet as ter Markelsfees is. Wat zeg ie, biej der nog nôôit e wes! Dan wördt het hôôge tied, al was ’t allèène mar um den machtigen optoch te bekiek’n. Het is neet zô mà nen optoch. Alle buurt’n doot zô’n betje met en doar bint nog à wat rèègeltjes woet ze zich an deent te hôôl’n. Nèuis ’n kinderoptoch zölt er meer dan vèèrtig grôôte feestwaag’ns duur ’t darp rie’n, met as ôônderwarp, Markel uut kuns. Zelf zà ‘k ter het zundagse pak en de pette ôk is vuur uut de kaste pakk’n, want as ‘t is as ààndere joar’n, möj’ der oen petje deepe vuur ofnemm’n. Àj’ de Poppe vuurbiej bint köj’ Markel neet miss’n. Zô gauw àj’ neet veerder könt zet ie de fietse mar äns neer en zeuk ie de gezelligheid vanzelf op. Geheid dàj’ bekèènd’n zeet en vuur dàj’ der arg in hebt zit ie te feest’n in de grôôte tèènte, biej de Smid of de Haverkamp. Vanuut Markel köj’ rechuut wier op Hoolt’n an, èèm’n uutbloaz’n biej de Poppe. Det kan ôk biej de Vennebekke, mà dan biej’ wà de verkèèrde kàànte uut e rèèdne. Ééne goeie road wi ‘k metgèèm’n. Gèèft neet alle geeld uut, want oaver vèèrtien daage stoat de Kèunefeest’n vuur de duure. Gen optoch, hôôguut ééne op moandag, van leuige portemonnees. Vuur det het zô veer is heiw we op zoaterdag könn’n geniet’n van het Meedeinfestijn, netuurlijk met de Hoolter Korhaan’n en de Hoolter Dèèrns. Dit joar goat de Korhaan’n internationaal, want hèèmoal uut Duutslàànd komt de zangers uut Borghorst. Zoaterdagmiddag, gezelligheid troef, um het zundagniddag nog èèm’n dunnekes oaver te doon met Bökkers dut Normaal. Doarnoa könt de jong’n hèèmoal uut eur dak met, Dartig Euro.Live. Kortumme, in disse tied van naarighèid, genog te doon um de zinn’n te verzett’n. Det heiw we hard nèurig, want det altied mar op de èèrste rang zitt’n vuur het kiekkäske, um te zeen woet ze wier een flatgebouw in mekaar scheet of, um minister Asscher te heur’n vertell’n det de haatimams het làànd wordt uut e zet, doar wôj’ compleet gestoord van. De politiek löp altied achter de gebuurteniss’n an. De leste kèèr det er imams het làànd uut wörd’n e zet was, toen Rita het stökske in hàànne had. Doarnoa hebt z’t loat’n versloff’n. Noet het gevoar um een köpke kleiner te word’n e maakt, als mà grötter wördt, stoat de keerls wier op de barricaad’n. Loat oe neet gek maak’n, hôôlt de kop der biej en goat zundag lekker noar ’t Markelse Feest. Det is wà ‘k goan doon, kiek’n wiet zundag in Markel de môôiste waag’n hef. Wis en waarachtig.
De Vèèrkàànte Viefkop.