Zie heet van huus uut Batjen Wegstapel en is een dochter van Jan Wegstapel en Tonia Reijlink. Geboor’n an de Dèimterweg op 24 augustus 1917.Het schriem’n van de OKB Battem zeg det de stamvader van alle Weg- en Wechstapels, Albert Wegstapel, in 1786 het lèèm’nslech zag, op de boerderieje van Jan Gerritsen of Wegstapel (Gijzenboer). De Wegstapels hôôlt zich van ôôldsher bèèzig met vark’nshààndel, zô ôk de vaa van Batjen. Zie kan zich nog good herinnern det eur vaa en ooms, de vark’nmarkt’n bezocht’n in Meppel en Riess’n. In eur kinderjoar’n gung’n ze nog met de klèèdwaag’n hèèmoa noar Meppel. In de joar’n dartig haalt vader Jan Wegstapel letterlijk en figuurlijk het riebewies biej börgemèister Baron van de Borch van Verwolde. Det gung nog à makkelijk. Hij was met de auto noar ’n Barg ekömm’n en det was het bewies det e kon rie. Batjen gung in ’n Diekerhook op schoole en kwam, as eenigst mèike, biej mèister Sterringa in de klasse. Ne fietse had ze neet, dus alle daag’n ne kilometer of viefe lôôp’n. Noar eeg’n zegg’n hef ze der, in de acht joar’n doar, neet ech völle eleert. Noa die schooltied geet ze deen’n biej boer Boode in Splôô. Leer’n melk’n, wass’n en klôômpe schoer’n, mar ôk het gedörste strôô opbind’n. An de schoole in Hoolt’n volgt ze ne landbouwkursus en ne kursus hààndmelk’n, biej de Hommelte in Splôô. Zie kan melk’n as de beste, want op de Hoolter landbouwtentoonstelling van 1937 haalt ze de èèrste pries. At ze wat eulder is, geet ze wark’n biej Wonnink in de winkel en biej Aaftink(Sèèns). In eur jonge joar’n rèist ze op vriejdag met eur moo noar de markt in Dèimter. Zie stapt op in ’n Diekerhook, det kon nog tut 1933. Netuurlijk was ze ieder joar op het Diekerhookse feest, mà de mèuiste herinnering hef ze an de meimarkt in Hoolt’n. De lèu trökk’n van café noar café en biej Boer biet wörd’n der volop edàànst en in enömm’n. Ôk de Kroep’nkààmpse karmse hef ze bezoch. Vaa vund det minder, zie hoom’n alle katt’nkarms’n neet of te lôôp’n. Zie trouwt op 28 mei 1942 met Hendrikus Beldman van de Blankenoa in Zuudloo. Het huwelijk wördt in Hoolt’n voltrökk’n duur A.J. Goldstein in in ezèèg’nt duur dôômie Jebbink. Biej Holterman nemt ze der èèrs een paar en dan geet het op Battum an. ’S oamds is ter een borreltje op de boerderieje. Gen echte brulfte want het is oorlogstied. De Blankenoa is in 1918 ekoch duur Jan Willem Beldman. Hij kwam van “Scholleman” op ’t Hoolterbrook. Zien zönne, Hendrik Beldman trouwd’n dus met Batjen Wegstapel en zô is de cirkel rôônd. Beldman en Wegstapel, het zol zich later nog vaaker herhaal’n.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
