Ja, zo neumt ze det. Vuur miej is het zô gangswieze àllèène mà meer wark. Ie hebt ’t neet in de gaat’n. Ie belt met de bàànke um iets te vroag’n en meteen zet ze oe an het wark. Ôj’ mà zo vrèindelijk wilt weer um in te logg’n en op ne link te drukk’n. Doar zit noe net de piene. Ie wilt neet op ne link drukk’n, ie wilt e hölp’n word’n duur eene den ie kent en neet duur ne stemme den oe zeg , biej vroag’n, toets eene en biej schade toetst tweie. Ie möt het àmoa zelf uutvôôg’ln. Ie bint bange dàj’ op ne verkèèrde toetse drukt. Zô gauw àj’ de digitale snelweg opgoat, möj’ oaverà op verdach wèèr. Éénen misstap en ie wordt uut emaakt, vuur dom dèèr, umdàj’ der in bint estunk’n. Alle daag’n schering en inslag. Het maakt neet uut, alle instanties prebèèrt um zô völle meugelijk, digitaal te doon. Zie schoeft alle wark en drukwark noar de klàànt’n. Het geet àllèène nog mar um geeld, geeld, geeld. Doar is niks meer oaver van die ôôle vertrouwde bàànke. Wat zeg ik, ie könt hèèmoa neet meer zô èèm’n de boer’nleenbàànke binn’n lôôp’n. Noe goat ze zelfs negatieve rèènte in rekkening breng’n op de spoarrekkening. Noh ja, doar zit wà ne grèènze an, mà het is toch te gek um woar te wèèr, dàj’ möt betaal’n umdàj’ al oe lèèm’n zuunig bint ewes. De fiscus dut er ôk dapper an met. Lèu met wat geeld meugt er alle joar opniejs oaver betaal’n. Zelfs àj’ uut de tied bint, wilt ze nog wat met hemm’n van wat er oaver is. Het veult as een grôôt onrech. Zôl het doarumme ôk weer, det er zô weinig vedusie is in de politiek. Het völt te begriep’n, an de eene kàànte graait ze, woer ze mà graai’n könt en an de ààndere kàànte bint ze hèèl royaal met ôôns geeld uutgèèm’n. Het riekere Noord Europa möt betaal’n vuur het Zuud’n. Op een gegèèm’n moment biej’ der kloar met. Det gekèukel met stikstof, bouwstops, àmoa van ’t gas of en greun’n stroom. Stopt er met, hèinig an, neet vuur de muziek uut lôôp’n. Vanachter de greune toafels köj’ vanalles bedèènk’n, mà de lèu möt het wà will’n, ààns kump ter heisa van. Det zeej’ wà, at de voetballers kampioen bint, komt ze met duuzenden biej mekaa. De oaverheid steet er biej. Het mag neet gebuur’n, mar op enig ôôg’nblik is het hekke van de dam
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
