Zie kônn’n wà ne Hoolterkràànte maak’n den drei kèèr zô dikke was. Teks was ter genog. De berich’n wadd’n good. De Hoolter war’n bliej met een krääntje van eur zelf. Onmeunig jammer, het môch neet zô weer. ‘N uutgèèver kôn ’t neet langer trekk’n. De inkomst’n uut advertèènties kônn’n de kràànte, diet de Hoolter het leefste lèèz’n, neet in stàànd hôôln en van de wind köj’ noe één kèèr neet lèèm’n. Het was neet ààns. Ie lèèst het good,WAS. Toen disse wekke bekèènd wörd’n, det ’n stekker der uut zôl goan, wörd’n de juuste lèu wakker. Één van de zaak’n diet’ ôk van de Hoolter möt hemm’n, geet vuur ne hèèl’n tied advertèèr’n. Ôk ààndere pertiën hebt an e gèèm’n, det ze Hoolt’ns niejs wilt hôôld’n en steun’. Misschien möw we as lèèzers ôk nog wà wat doon. Môch’n doar ideeën oaver weer dan doo’k met. Ie könt netuurlijk gen mèinse in de portemennee kiek’n, mà at ze oe vroagt en ie könt het miss’n, loat Hoolt’ns Niejs dan neet in de keulte stoan. De lèu diet hier àmoal achter zit, deen’ wiej te bedàànk’n. Netuurlijk bint ter ôk lèu diet het leefste hebt det’ mà weg möt. Det meugt ze vind’n, wiej lèèft gelukkig in een vriej làànd. Mà dan is ter nog één geluk, de digitale kràànte geet vedan. (www.Holtensnieuws.nl) Op ’n dag det Hoolt’ns Niejs biej oe in de busse veuilt
en gelukkig neet vuur de leste kèèr, is het koneginnedag. Grôôt fees in Hoolt’n en det heult nog an tut en met vief mei, met het herdèènk’n en 65 joar bevrijding. Geniet ter àmoal van, loat het neet langs oe hen goan. Doar bint wà meer dan tweihonderd lèu moandenlàànk drôk met e wes. Koneginnedag, de grôôte herdenking op ’n Canadeez’n karkhof en de bevrijding. Hoolt’n löt wier zeen woet ze good in bint. Met mekaar iets vuur mekaa boks’n. Doar bint ne hôôp stroat’n versierd. Viem’ntwintig kilometer fiets- en autoroute, langs àmoa dinge diet doot dèènk’n an’ oorlog, steet in de vlagg’n. Het bevrijdingsvèur wördt op e haald uut Wagening’n, De ôôle motors zölt wier duur ’n Bèusebarg hen brull’n. OCH spölt det de stukk’n der of vleegt. HMV verzörgt ne taptoe en de Fienpreuvers hebt ’n tap lös in de “Maple Leaf Bar”. Zoaterdagoamd, Tjoepa-bevrijdingfees op Kalfstermanswèire. Een fees vuur iedereene, vuur viem’nzestig joar vriejheid. Kiekt alle daag’n mar op de tèlèvisie en ie wèèt wat vun gekk’nwark oorlog is. Herdèènk’n en geniet’n van viem’nzestig joar zôônder oorlog. Doar is nog völle meer te doon. Sloat ter het programmabeukske mar op noa en ie zölt zeen, det ter vuur iedereene wat biej zit. An het èine van al die feestelijkheed’n, as ofsluuting, een grôôt vèurwark op het Vletgoar. Ik hoppe daw we mekaa tèèg’n komt biej het fees, biej de herdenking of woer dan ôk. Àmoa völle wille en maakt ter een môôi fees van. Wis en waarachtig.
De Vèèrkàànte Viefkop.
