Verjonging is het èèrste wat ik lèèze. Det dut good. Ik dèènke trugge an de tied det het èèrste Kèunefeest wörd’n e heul’n. Een stelletje jonge börssels dörm’n het an um een groot feest op peute te zett’n. Doar stun de plaatselijke middenstand en de gemeente nog neet drek um te juich’n. “Zô’n feest in Hoolt’n, det lukt nôôit, det kan allèène mar in Markel, Battum en Loarne.” Gelukkig wadd’n disse keerls eengwies genog um duur te drukk’n. Doar kwam ne tèènte in de weire van Kalfstermans Mans en doar gung ’t hen. Doar wadd’n wà rèègels , mar ie mogg’n nog gewoon een gat in de wèire grèèm’n. Doar kwam de WC-waag’n biej te stoan en zô konn’n de lèu het oavertollige vôch kwiet.
Joar’nlàànk doarvuur haw we de Hoolter meimark op Kalfstermansweire, met ne beeste en varkensmarkt. Vuur ôôns dubbele wille, want bèire opa’s en vaa zatt’n in ‘n hààndel. Tuss’n de hààndel duur trökk’n ze de knippe en kon e wiej wier een paar rondjes in de drèèimölle. Met de joar’n was ’n hààndel gebuurt en kwam de meimark in verval.
Doar was ne braderie, meer det was neet op de Kalfstermanswèire. De jonge generatie had, in 1968, carnaval in ’t lèèm’n e reup’n en biej hun twei en twintig joarig bestoan mös ter een grôôt Hoolter feest komm’n, as ofsluuting van dit jubileum. Het was neet de bedoeling um de Battumse Karmse, of wat vun fees dan ôk, noar te aap’n, nee, gewoon een Hoolt’ns fees vuur alle Hoolter. Det is meer dan e lukt. Hèèl Hoolt’n steet er noe achter en de nieje generaties wèèt à neet ààns meer. Ie zeet met plezèèr, det de commissie zichzelf blif verjong’n en verààndern, met de tied met geet en het lef hef um te voldoon an al die strabààne regels van vandaage an’n dag.
De Kèunefeest’n, zie stoat vuur de duure. Op dôônderdagmiddag begint het vuur de schoolwichter en ’s oamds könt de allerjungst’n de bôch duur met de Reeperbahner. Vriejdagmiddag komt de bedriem’n an de buurte. Det wördt wat met ’n grötst’n barbequie van de wereld. Op zoaterdagmiddag, köj’, neuist het scheet’n en het dart’n, meedein’n op de deuntjes van het Brookduo en Ben Lansink. Netuurlijk bint er de Korhaan’n en de Hoolter dèèrns. Te völle um àmoa op te neum’n. Het feest davert vedan, met op zundag vuur de leefhebbers, ôôndermeer Bökkers. De zoaterdag- en de zundagmiddag bint echte femiliedaag’n, doar is vuur de wichter, kleinwichter en alle opoe’s en opa’s genog te doon. Dus de knippe binnenste buut’n en geniet’n op het Kèunefeestplein, van al det jonge grut. Àj’ ech wilt preum’n van dit Hooltense feest en ie bint er nog nôôit e wes, goat dan met mekaa noar het Meedeinfestijn. Vuur daj’ der arg in hebt goaj’ met in de mennigte “Hoolten mien làànd, drei kèèr verzöppen en vèèr kèèr verbràànd, wis en waarachtig.
De Vèèrkàànte Viefkop.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
